Halitta Mai Ban Alʻajibi

Mun san halayen mutum na ciki—ruhunsa da ransa—amma kada mu makance ga gaskiyar cewa jikin mutum ma halittar Allah ce mai ban al’ajibi da ban mamaki. Masu Bi da yawa ba sa darajanta ko kula da jikinsu yadda ya kamata. Kafin numfashin Allah ya shiga cikin wannan siffar yumɓun, yumbu ne kawai—bai wuce haka ba. Ya zama rayayye, mai aiki a zahiri tare da dukan kwayoyin halitta, sassa, da gaɓoɓinsa ta wurin sarrafawar aikin al’ajibi na Ruhun Allah.

Mu dubi misali na idon ɗan adam. A wani shirin talabijin, Ƙungiyar Masanan Ido ta Amurka ta gabatar da wasu bayanai masu ban sha'awa. Idan na tuna da kyau, sun ce idon ɗan adam ɗaya yana ƙunshe da sassa masu aiki sama da miliyan uku. Me ya kawo hakan? Numfashin Allah. Dukan tsoka, jijiyoyi, da ɓangarori—duk ayyukan jikinmu na zahiri—sun samo asali ne daga numfashin Allah da aka hura. Wannan shi ne abin da ya maida yumɓu ya zama wani abu mai ban al’ajibi. Idan ka fahimci wannan gaskiyar, mu'ujizar warkarwa ta Allah za ta zama da sauki. Wanene zai iya gyarawa, ya maido, in kuma da bukata, a sake halittar jikin fiye da abin da aka mora aka yi shi tun da farko? Ruhun Allah shi ne Mahalicci Mai Warkarwa kuma.

Na sami damar ganin mu'ujizai na halittar Allah inda aka maida ƙasusuwan da babu su. Na taɓa rokon addu'a domin wata ƙaramar yarinya a San Jose, California, wadda aka haifi ƙanwarta babu ƙashin saman ƙafafu biyu. Sakamakon addu'a, Allah ya halitta ƙasusuwan. Ban ce abu mai sauƙi ba ne, amma abin al’ajibi ne idan ka fahimci asalin jikin ɗan adam. Yumbu ne kawai aka siffata kafin Ruhun Allah ya motsa a kansa ya samar da wata halitta mai wuyar fahimta wadda Mahaliccinta zai iya warkarwa.