Guhindurwa Mushya n'Umwuka

Urugendo rw’agakiza rurimo kongera guhindurwa mushya. Muri Tito 3:5, dusoma:

"Iradukiza, itabitewe n’imirimo yo gukiranuka twakoze, ahubwo ku bw’imbabazi zayo idukirisha kuhagirwa ari ko kubyarwa ubwa kabiri, ikadukirisha no guhindurwa bashya n’Umwuka Wera."

Ingingo ya nyuma Pawulo yavuze muri uyu murongo ni ukugirwa mushya. Tugomba guhinduka ibiremwa bishya. Pawulo yagize ati:

"Umuntu wese iyo ari muri Kristo aba ari icyaremwe gishya, ibya kera biba bishize. Dore byose biba bihindutse bishya!" (2 Abakorinto 5:17)

Ijambo "kurema" ni ingenzi, kuko hariho umwe gusa urema—Imana. Umuntu ashobora gukora ibintu, gusana, cyangwa kubyaza ikintu mo ikindi, ariko ntashobora kurema. Imitima yacu n'umuntu wacu w'imbere byose byarandujwe cyane kandi byagoramishijwe n'ingaruka z'icyaha ku buryo gusana cyangwa gutera ibiremo nta cyo byatumarira. Ikiremwa gishya gusa ni cyo cyonyine kizaba cyiza.

Mu Isezerano rya Kera, nyuma y'uko Dawidi yari amaze kugwa mu busambanyi, akica umuntu, kandi amaherezo akamenyeshwa ububi bw'umutima we, yaririye Imana mu mubabaro mwinshi, ati, “'Mana, undememo umutima wera” (Zaburi 51:10). Yari azi ko kurema byagombaga kuva ku Mana; ntibyashoboraga kubaho binyuze mu buryo ubwo ari bwo bwose bw'abantu.

Muri Tito 3:5, twabonye ibice bitatu by'urugendo rwo gukizwa:

• Kwoza, cyangwa kweza;
• Guhindurwa mushya, cyangwa kuvuka bundi bushya; n’
• Ivugururwa, cyangwa Iremwa rishya.

Imana ikora ikintu umuntu adashobora na gato gukora. Ibi byose ni ku bw'imbabazi z'Imana, si ubutabera bwayo. Si ku bw'imirimo yacu yo gukiranuka—iyo ntacyo yageraho. Agakiza kagomba guturuka ku mbabazi z'Imana z'ubudahangarwa bwayo.