Waguzwe Burundu

Mu Baroma, dusoma ibyerekeye ubwami bubiri hamwe n’amategeko y'imikorere yabwo ahanganye. Itegeko rya satani ni itegeko ry'icyaha n'urupfu; itegeko ry'ubwami bw'Imana ni itegeko ry'Umwuka w'ubugingo muri Kristo Yesu.

“Kuko itegeko ry'Umwuka w'ubugingo muri Kristo Yesu ryambatuye ububata bw’itegeko ry'icyaha n'urupfu” (Abaroma 8:2)

Ntitukiri mu gace ka satani, ntitukiri munsi y'amategeko ya satani. Ibyo ubwami bwe ntibitureba kuko turi mu bundi bwami. Twarimuwe, twarambukijwe—umwuka, ubugingo, n'umubiri. Kandi iki gikorwa kibaho binyuze mu maraso ya Yesu—twaratunganijwe, dutoranirizwa Imana binyuze mu maraso ya Yesu.

Noneho, reka turebe icyo ibi bivuze ku mubiri w'umwizera. Nshobora kuvuga nkurikije ubunararibonye ko ariho bitangira gukora neza, iyo tubizanye mu rwego rw'imibiri yacu. Tekereza kuri ibi:

“Mbese ntimuzi yuko imibiri yanyu ari insengero z’Umwuka Wera uri muri mwe, uwo mufite wavuye ku Mana? Kandi ntimuri abanyu ngo mwigenge kuko mwaguzwe igiciro. Nuko rero mutume imibiri yanyu ihimbaza Imana” (1 Abakorinto 6:19–20)

Aya magambo "mwaguzwe igiciro" adusubiza ku nsanganyamatsiko yo gucungurwa. Twaraguzwe tuvanwa mu kiganza cya satani n'amaraso ya Yesu. Ni ibingana iki byacu byaguzwe? Ni roho zacu gusa? Oya, roho zacu n'imibiri yacu byombi ni iby'Imana kuko Yesu yishyuye igiciro cyose cyo gucungurwa ikiguzi cy’amaraso ye.