Akira imbabazi z'Imana

Muri uru ruhererekane rw'ibice bine ku nsanganyamatsiko y'ubwibone no kwicisha bugufi, twize amategeko ahoraho, agenga byose yavuzwe na Yesu muri Matayo 23:12:

“Uzishyira hejuru azacishwa bugufi, uzicisha bugufi azashyirwa hejuru.”

Gutera imbere mu mwuka

Muri iyi baruwa yo Kwigisha, turimo kuvuga ku gice cya gatatu cy’uruhererekane rw'ibice bine bivuga ku kibazo gikomeye cyo gutsinda ubwibone no kugendera mu kwicisha bugufi. Twatangiye uruhererekane tumenya ko imiterere y'urugamba rwacu n'ubwibone ari icyifuzo cyo kwishyira hejuru no kwigenga ku Mana - imyifatire isanzwe ku isi muri iki gihe, nyamara ikaba imwe iganisha ku kwigomeka no kurimbuka. Umuti w’iyi myitwarire yiganje ni ihame rusange ryavuzwe na Yesu muri Matayo 23:12: Uzishyira hejuru azacishwa bugufi, uzicisha bugufi azashyirwa hejuru”. Twasuzumye kandi ibisubizo bitandukanye n’ibyo biva mu kwishyira hejuru no kwicisha bugufi. Muri Lusiferi, wabaye Satani, twabonye urugero rwiza rwo kwishyira hejuru n'ingaruka zabyo. Muri Yesu twabonye urugero rwiza rwo kwicisha bugufi n'ingaruka zabyo. Derek atwereka ko aya mategeko akora kimwe neza kandi hose mu buzima bwa buri wese muri twe.

Mu butumwa bwacu bwa mbere bubiri, twize ubuzima bwa Yesu nk’urugero rwiza rwo gutsinda ubwibone binyuze mu kwicisha bugufi. Ubutumwa bwacu bwakurikiyeho bwari uburyo bwo gushyira mu bikorwako ubwo buryo - intambwe igomba kuba kuri buri wese muri twe kugira ngo tujye mu ntambwe ya mbere y’imibanire mizima n’Imana. Ibi bituzana muri iyi nyigisho y’ubu, aho turibusobanukirwe uburyo kwicisha bugufi bisabwa kugira ngo dutere imbere mu gukura mu buzima bwa gikristo. Kuri buri wese muri twe, iterambere ryacu rizaba rihuye n’urwego dukomeje kwicishaho bugufi.

Ubusabe bushiritse Amanga

Mbere ya byose, ndashaka kwibanda ku nzira iganisha ku buyobozi mu mubiri wa Kristo, mu bwoko bw'Imana, abigishwa ba Yesu. Turafatira urugero ku byabaye hafi y’irangira ry’umurimo wa Yesu wo ku isi, byanditswe muri Matayo 20: 20-28. Mu byari biri kuba muri iki gice, nyina w'abigishwa ba Yesu babiri - Yakobo na Yohani, abahungu ba Zebedayo - yaje kuri Yesu azanye ubusabe budasanzwe mu izina ry'abahungu be bombi. Reka twite kuri byombi icyasabwaga hamwe n’igisubizo Yesu yatanze. Inkuru itangirira muri Matayo 20:20:

“Maze nyina wa bene Zebedayo azana n'abana be aho ari, aramupfukamira ngo agire icyo amusaba. Na we aramubaza ati “Urashaka iki?” Aramusubiza ati “Tegeka ko aba bana banjye bombi bazicara mu bwami bwawe, umwe iburyo bwawe undi ibumoso.” Yesu aramusubiza ati “Ntimuzi icyo musaba. Mwabasha kunywera ku gikombe nzanyweraho?”. Bati “Turabibasha.” Arababwira ati “Ni ukuri igikombe cyanjye muzakinyweraho, ariko kwicara iburyo bwanjye n'ibumoso si jye ubigaba, keretse abo Data yabitunganyirije.” Ba bandi cumi babyumvise barakarira abo bavandimwe bombi. ”

Igisabwa Nyacyo

Kuki bararakaye? Hariho impamvu imwe gusa yatumaga bagombye kurakara. Nabo ubwabo bifuzaga iyo myanya yombi y’icyubahiro cyane iburyo n'ibumoso bwa Yesu. Impamvu nyinshi zashyizwe ahagaragara muri ibi bintu byoroshye byabaye.

"Yesu arabahamagara arababwira ati “Muzi yuko abami b'abanyamahanga babatwaza igitugu, n'abakomeye babo bahawe kubategeka. Ariko muri mwe si ko biri, ahubwo ushaka kuba mukuru muri mwe ajye aba umugaragu wanyu, kandi ushaka kuba uw'imbere muri mwe, ajye aba imbata yanyu ... '”(umurongo wa 25-27, NIV)

Iri jambo, "imbata" - ni ijambo ribi, sibyo? Kandi nyamara, nicyo gisabwa nyacyo. Niba ushaka kuba mukuru, ugomba kuba umugaragu. Niba ushaka kuba uwambere - ukomeye kurutaho - ugomba kuba munsi y’abandi. Ugomba kuba imbata.

“...nk'uko Umwana w'umuntu ataje gukorerwa, ahubwo yaje gukorera abandi no gutangira ubugingo bwe kuba incungu ya benshi.” (umurongo wa 28, NIV)

Turabona rero hano ihame ry’amategeko yo kuzamurwa mu bwami bw'Imana. Niryo tegeko twarimo turebaho hose muri ubu butumwa ku Kugereranya Ubwibone no Kwicisha Bugufi. Inzira izamuka ni inzira yo kumanuka. Niba ushaka kujya hejuru, wuname hasi. Niba ushaka kuba umutegetsi - niba ushaka kuba umuyobozi - ube umugaragu. Niba ushaka kuba umutware, ube imbata.

Nanone kandi, ndashaka gushimangira ko iri hame rikora mu buzima bwose, mu bice byose by’isanzure. Nta rengayobora riri kuri iri tegeko. Nkuko mu bisanzwe twavuga ko mu isi y’ibifatika nta rengayobora riri ku mategeko agenga imbaraga za rukuruzi, niko no mu isi y’umwuka nta rengayobora riri kuri iri tegeko. Iri ni ryo tegeko rihoraho, ku isi yose yavuzwe na Yesu muri Matayo 23:12, “Uzishyira hejuru azacishwa bugufi, uzicisha bugufi azashyirwa hejuru.". Nta bundi buryo bwemewe bwo kuzamurwa mu Bwami bw'Imana ngo ube umuyobozi, uretse binyuze mu kwicisha bugufi.

Reka nkubwire ko inshuro nyinshi twirengagiza iri tegeko mu mahame yacu yo kuzamurwa mu itorero. Duhitamo abantu kubera ko bagiye mu iseminari, kubera amashuri yabo, kubera impano yabo yo kubwiriza. Inshuro nyinshi, amahitamo nk’aya ahinduka mabi k’umubiri wa Kristo kuko twirengagije ihame ry’ingenzi - umuntu wese utarize kwicisha bugufi ntabwo akwiriye kuba umuyobozi w’ubwoko bw’Imana.

Ihwa rya Pawulo mu mubiri

Muri iki gice, ndashaka kukwereka iri hame rikora mu byabaye ku ntumwa Pawulo. Reka dusome ubuhamya bwa Pawulo abuvuga ubwe n'ubunararibonye bwe bwatanzwe mu 2 Abakorinto 12: 7-10. Mbere y'iyi mirongo, Pawulo yavugaga ku guhishurirwa gukomeye, kudasanzwe kwerekeye Ubutumwa bwiza n'Itorero yari yarahawe na Nyagasani. Hanyuma asobanura uburyo Imana yamugenje kubera ibyo byahishuwe.

"Kugira ngo ne guterwa kwishyira hejuru kurenze ibikwiriye ni uko nahishuriwe ibikomeye cyane, ni cyo cyatumye mpabwa igishākwe cyo mu mubiri, ari cyo ntumwa ya Satani yo kunkubita ibipfunsi"

Reka nerekane gusa ko ubu atari bwo buryo twatekereza. Twatekereza ko turamutse dufite ihishurirwa ritangaje, ibintu byose byagenda neza. Ubuzima bwakoroha cyane. Nyamara, akenshi ibinyuranye niko kuri. Umuntu ufite ihishurirwa rikomeye niwe muntu ubabara cyane. Hanyuma Pawulo ati:

"Kuri icyo kintu ninginze Umwami wacu gatatu ngo kimvemo."

Reka tumenye hano ko iyo dusenga, dukeneye kwibuka ikintu kimwe. “Oya” ni igisubizo kimwe na “yego.” Muri iki gihe, Pawulo yasenze inshuro eshatu - kandi igihe cyose yabonaga igisubizo kimwe: “oya.” Turabona ibisobanuro by’Uwiteka ku murongo wa 9:

"Ariko arampakanira ati “Ubuntu bwanjye buraguhagije, kuko aho intege nke ziri ari ho imbaraga zanjye zuzura.” [Maze Pawulo agakomeza ati:] Nuko [mu yandi magambo uku niko iri hame rikora] nzanezerwa cyane kwirata intege nke zanjye, ngo imbaraga za Kristo zinzeho. Ni cyo gituma ku bwa Kristo nzishimira intege nke zanjye no guhemurwa, nzishimira n'imibabaro no kurenganywa n'ibyago. Kuko iyo mbaye umunyantege nke ari ho ndushaho kugira imbaraga. ”

Ndibaza niba ushobora kuvuga ibyo. Muby’ukuri, ndimo nibaza nti: "Nabasha kubivuga?" Ni abantu bangahe bashobora kuvuga bati: "Nishimira mu ntege nke, mu bitutsi, mu bibazo, mu gutotezwa, mu bigoye"? Ese urabyuumva ko impamvu yatumye Pawulo yishimira muri ibyo bintu ari uko yari yarize amahame - amahame amwe n’ayo twiga hano? Ikintu cyose kintera kujya hasi, ikintu cyose kinyambura icyubahiro cyanyuma cy’ubwibone cyangwa ubwiyemezi cyangwa kwigirira icyizere - iyo niyo nzira yo kuzamurwa kwanjye. Urugero njyaho hasi, niko Imana irimo inzamura hejuru. Uko ngira bike muri njye, niko nshobora kwakira ibiva ku Mana. Iyo mfite intege nke, noneho mba nkomeye. Kubera iki? Kubera ko imbaraga z'Imana zikora neza mu ntege nke zacu.

Igihe cyose dufite byinshi byacu, ntidukeneye byinshi biva ku Mana. Ariko iyo twambuwe ibyacu, noneho dukenera ibyo Imana idufitiye byose - kandi biboneka k’ubuntu.

Kwicisha bugufi muri Yohana Umubatiza

Mu gice gikurikira, ndashaka ko ubona iri hame ryerekanwe n’umugabo waje nk’integuza ya Yesu: Yohana Umubatiza. Yari umuntu wari ufite umurimo wihariye wo gutegura inzira ya Mesiya. Igihe kimwe mu murimo wa Yohana, abantu bamukurikiye bamuhaye amakuru atangaje kuri Yesu, umuntu yari yaje gutegurira inzira. Uwo yari yatangaje ko ari Mesiya yarimo ahindura abantu benshi kandi abatiza abantu benshi kuruta Yohana ubwe. Ndakeka ko abantu babwiye Yohana Umubatiza aya makuru bari biteze ko ari bubibone nabi - gutenguhwa. Bumvaga ko ubwibone bwe buzakomereka kandi amarangamutima ye akababara. Batekerezaga ko atakwifuza kubona mubyara we - wari muto kuri we kandi uwo yari yarakinguriye umuryango w’umurimo - abigeraho muri ubu buryo. Batekereje ko Yohana atakwifuza kubona Yesu azamuwe hejuru ye. Dushobora gushimira Imana ko iyi itariyo myitwarire ya Yohana Umubatiza. Tubona icyo avuga ku byabaye muri Yohana 3:30:

“Uwo [ni ukuvuga Yesu] akwiriye gukuzwa, naho jye nkwiriye kwicisha bugufi.”

Mbega ibanga riri muri ayo magambo! Urashaka byinshi kuri Yesu? Ubwo rero hagomba kubaho bike byawe. Urashaka imbaraga nyinshi z'Imana? Ubwo rero ugomba kubona intege nke zawe. Urashaka gusigwa kw'Imana? Ubwo rero ugomba kwiyambura icyizere cyose mu bushobozi bwawe bw’umubiri. Mu gihe ugenda uba muto, Yesu muri wowe aba munini. Imbaraga ze zuzura neza mu ntege nke zawe, no mu ntege nke zanjye.

Guhanga amaso yacu

Ibi binyibutsa amagambo yigeze kuvugwa n’umuvugabutumwa watashye, Dwight L. Moody; "Najyaga ngira ngo impano z'Imana ziri ku matajeri imwe hejuru y’indi; kandi ko uko dukura tukaba barebare mu mico ya gikristo bigenda byoroha kuzigeraho. Ubu nasanze impano z'Imana ziri ku matajeri imwe munsi y’indi. Ntabwo ari ikibazo cyo gukura uba muremure ahubwo ni icyo kunama hasi; ko tugomba kumanuka, buri gihe tujya hasi, kugira ngo tubone impano zayo nziza."¹ ;

Mu byo turimo kuganira byose muri ubu butumwa, ibanga nyaryo ni ugukomeza guhanga amaso Yesu, We ubwe. Tugomba kwibuka ko ariwe cyitegererezo - uwo ihame ryakorewemo neza. Abaheburayo 12: 2 hagira hati:

"Dutumbira Yesu wenyine, ari we Banze ryo kwizera kandi ari we ugusohoza rwose, yihanganiye umusaraba ku bw'ibyishimo byamushyizwe imbere ntiyita ku isoni zawo, yicara iburyo bw'intebe y'Imana. ” (NIV)

Na none, ni irihe hame tubona ryerekanwe hano? Inzira ijya hejuru iramanuka. Nk’uko byari kuri Yesu, natwe niko biri. Inzira ijya ku ntebe y’ubwami inyura ku musaraba.

Umurimo wacu ni ukwakira ku bushake urupfu rw’ubwibone bwose, kwigirira icyizere, ibyo twiyitirira mu mubiri byose tuvuga ko turi ikintu runaka. Mu gihe turetse ibyo byose byo kwikunda bigapfira k’umusaraba Imana itanze, inzira igana ku ntebe y’ubwami iradukingukira. Reka rero duhange amaso Yesu, we banze ryo kwizera kwacu kandi unagusohoza.