Zaɓar Alheri

"Don haka ina roƙonku 'yan'uwa, saboda yawan jinƙai na Allah, ku miƙa jikinku hadaya rayayyiya, tsattsarka, abar karɓa ga Allah." (Romawa 12:1)

Maganar kawai ita ce maida hankalinmu, sannan miƙa kai - bi da bi. Idan ba mu amince ba, ta wurin halayenmu, za mu miƙa kai ga abin da bai dace ba. Dole ne mu daina miƙa jikkunan mu, gaɓoɓinmu, ga zunubi. Lokacin da muke marasa bi, mun yi hakan na dogon lokaci. Amma wajibi ne mu dakata mu ce, "Wannan shi ne ƙarshen hakan!" Da zarar muka miƙa nufinmu ga Allah, ba za mu miƙa gabobinmu ga Shaiɗan ba.

"Domin zunubi ba zai mallake ku ba, tun da yake ba shari’a take iko da ku ba alherin Allah ne " (Romawa 6:14)

Ma'anar wannan magana tana da faɗi sosai. Bulus ya ce ba ƙarƙashin shari’a muke ba amma ƙarƙashin alheri. Zai zama ko dai ɗaya ne ko kuma ɗayan - ba zai yiwu ya zama duka biyun a lokaci guda ba. Idan muna ƙarƙashin shari’a, ba mu ƙarƙashin alheri. Idan muna ƙarƙashin alheri, ba mu ƙarƙashin shari’a.

Bugu da ƙari, Bulus ya ce zunubi ba zai mallake mu ba, domin ba ƙarƙashin shari’a muke ba. Abin lura shi ne, idan muna ƙarƙashin shari’a, zunubi zai mallake mu. Wannan magana ce mai tada hankali ga mutane da yawa, amma wannan shi ne abin da Littafi Mai Tsarki yake ta faɗa.

Ba wasu ƙa'idodi da ke mulkinmu. Mun zama 'ya'yan Allah, kuma muna yi masa biyayya saboda muna ƙaunarsa. Daga yanzu, sai ƙauna, ba tsoro ba, shi ne abin da yake karfafa mu ga yin biyayya. Allah bai mai da mu bayi ba; Shari'a ce ta yi haka. Allah ya mai da mu 'ya'yansa maza da mata. Dole ne mu zaɓi Shari'a ko alherin Allah.