Moyo Mkamilifu kwa Mungu (Sehemu ya 1)

“Kwa kuwa macho ya Bwana yanazunguka dunia yote ili kuwatia nguvu wale ambao mioyo yao inamtegemea kwa ukamilifu. Umefanya jambo la upumbavu, na kuanzia sasa na kuendelea utakuwa na vita” (2 Nya. 16:9)

Roho wa Bwana anazunguka huku na huko katika dunia yote akitafuta mtu wa aina fulani aina fulani ya mtu; mtu ambaye moyo wake ni mkamilifu kwa Mungu. Wakati wowote Roho Mtakatifu anapompata mtu wa namna hiyo, Mungu hufurahia kuonyesha nguvu zake kwa ajili yake, akidhihirsha uwepo, nguvu, na kibali katika maisha na huduma ya mtu huyo. Mungu yuko tayari kujionyesha kwa nguvu na kwa baraka.

Moyo Uliyo Kamilika Mbele za Mungu

Watu wawili katika Maandiko ambao imeandikwa kwamba walikuwa na moyo mkamilifu mbele za Mungu ni Abrahamu na Ayubu. Katika Mwanzo 17:1 tunasoma changamoto hii aliyowekewa Abrahamu:

“Abramu alipokuwa na umri wa miaka tisini na tisa, Bwana akamtokea, akamwambia, “Mimi ndimi Mungu Mwenyezi; nenda mbele zangu na uishi kwa unyofu.” Wakati huu Abrahamu alikuwa ametembea na Mungu kwa muda wa miaka ishirini na minne; wito wa Mungu ulimjia Abrahamu alipokuwa na umri wa miaka sabini na tano. Lakini sasa alikuwa anafikia kilele cha ukuaji wake wa kiroho—hatua ambapo Mungu alikuwa karibu kutimiza kwa njia ya ajabu na ya utukufu zile ahadi ambazo zilimvuta Abrahamu kutoka Uru wa Wakaldayo miaka mingi iliyopita. Abrahamu alikabiliwa na changamoto mpya kutoka kwa Mungu. Kwa maneno mengine, Mungu alikuwa akimwambia: “Kuanzia sasa, macho Yangu yatakuwa juu yako kwa namna ya pekee. Nitatazama kila hatua unayopiga, nitasikiliza kila neno unalonena,na ninaomba kwamba kila kitu utakachofanya kifanywe kwa moyo wa utii mkamilifu, imani thabiti, na kujitoa kamili kwangu.”

Abrahamu ni baba wa wote waaminio (tazama Warumi 4:11–12). Kwa maneno mengine, maisha yake na imani yake ni mfano kwa waamini wote. Naamini kwamba kile ambacho Mungu anakitaka kwa kila mmoja wetu kimeelezwa wazi katika maneno aliyomwambia Abrahamu: “Uenende mbele zangu nawe uwe mkamilifu, nami nitafanya agano langu kati yangu na wewe, nami nitakuzidisha sana sana.”

Sote tunakaribia kipindi cha utimilifu wa kusudi la Mungu kwa vizazi vyote. Na ujumbe wa Mungu kwa kila mtu ambaye anatakiwa kuchukua nafasi yake katika kazi ya Mungu ni huu: " Uenende mbele zangu nawe uwe mkamilifu."

Katika kitabu cha Ayubu, tunamkuta mtu mwingine ambaye moyo wake ulikuwa mkamilifu mbele za Mungu. Marafiki wa Ayubu hawakumsifu sana, lakini kile ambacho Bwana alisema kumhusu Ayubu ndicho kinachotuvutia zaidi:

“Je, umemwangalia mtumishi wangu Ayubu, kwamba hakuna yeyote kama yeye duniani, mtu mkamilifu [mkamilifu] na mwadilifu, anayemcha Mungu na kuepuka uovu?” ( Ayubu 1:8 )

Kwa hiyo, tunaweza kusema kwamba ukamilifu mbele za Mungu unahusisha mtazamo sahihi kwa Mungu na mtazamo sahihi dhidi ya uovu.Hakuna upande wa kati katika ukamilifu katika uhusiano na Mungu. Hufanyi maelewano na chochote kisichompendeza Yeye; umejitolea kabisa kutii—haijalishi gharama yake ni nini. Na kumbuka, inagharimu kitu ili kuidhinishwa na Mungu!

Tukisoma vitabu vya Wafalme na Mambo ya Nyakati, tunaona kwamba wafalme walipimwa kwa kiasi fulani kulingana na kama mioyo yao ilikuwa kamili katika uhusiano na Mungu au la. Kuhusu Asa, Yehoshafati, Hezekia, na wengineo, imeandikwa kwamba walikuwa na mioyo kamili katika uhusiano na Mungu. Lakini mfano mkuu wa mtu ambaye moyo wake ulikuwa kamili katika uhusiano na Mungu ni Daudi. Yeye ndiye alikuwa kipimo ambacho wafalme wengine walilinganishwa nacho.

Kumbuka kwamba hatuzungumzii kuhusu moyo ulio kamili kwa maana ya kutokuwa na dosari, bali moyo ulio kamili katika uhusiano na Mungu. Daudi hakuwa mkamilifu kimaadili kila wakati. Kama unavyojua, alizini. Ingawa Maandiko hayahalalishi uzinzi, hapa hayazungumzii ukamilifu wa kimaadili, bali yanazungumzia mtazamo na hali ya moyo wa Daudi kuelekea Mungu.

Katika Kutoka 20:1–3 tunapata hitaji la kwanza la kuwa na moyo ambao ni mkamilifu kwa Mungu. “Ndipo Mungu akasema maneno haya yote: “Mimi ndimi Bwana Mungu wako, niliyekutoa Misri, kutoka nchi ya utumwa. “Usiwe na miungu mingine ila mimi." Kuwa mkamilifu kwa Mungu ina maana kwamba mtu hana miungu mingine ila Yeye. Swali la msingi kwa Daudi, na kwetu sisi, ni “Mungu wako ni nani?”

Swali hili hili la msingi, "Mungu wako ni nani?" ililiwekwa tena mbele ya Israeli na Musa katika Kumbukumbu la Torati, muda mfupi kabla hawajaingia katika nchi ya ahadi. Jibu lao kwa swali hilo liliamua hatima ya maisha yao. Baadaye, wakati Roho Mtakatifu alishuka juu ya Israeli wakati wa dhabihu ya Eliya katika mlima Karmeli, hawakuhitaji kusema chochote kingine ila: “Bwana, ndiye Mungu” (1 Wafalme 18:39). Ukiweza kusema hivyo—hata kama unakumbana na matatizo, unakosea, au hata unatenda dhambi—bado utakuja kushinda mwishoni.

Hii inatuleta katika hatua ya kujichunguza binafsi kuhusiana na swali hili la msingi. Tunapaswa kujiuliza: “Tunawezaje kujua Mungu wetu ni nani?” Katika Mwanzo 31, Yakobo, akizungumza na Labani, alisema, “Umebadilisha mshahara wangu mara kumi.” Lakini Mungu hakumruhusu aondoke. Aliendelea, “Kama Mungu wa baba yangu, Mungu wa Abrahamu na Hofu ya Isaka, hakuwa pamoja nami, hakika ungenifukuza mikono mitupu. Lakini Mungu ameona taabu yangu na kazi ngumu ya mikono yangu, naye usiku uliopita amekukemea” (mstari 42). Angalia maneno haya—“Mungu wa Abrahamu, na Hofu ya Isaka.” Yakobo alitumia maelezo “Hofu ya Isaka” alipozungumza kuhusu Mungu wa Isaka. Kwa hakika, basi, chochote unachokiogopa ndicho mungu wako!

Watu wengine hufanya saratani kuwa mungu wao. Wanaogopa sana saratani kiasi kwamba wanaihofia zaidi kuliko wanavyomwogopa Mungu. Vivyo hivyo, watu wanaojihusisha na uchawi, uganga, na ushirikina hujikuta katika utumwa mkubwa wa hofu kwa nguvu hizi za kishetani kiasi kwamba zinakuwa “miungu” yao. Mimi natamani nisiogope chochote isipokuwa Mungu wa Abrahamu, Isaka na Yakobo! Kwa maana mtu anayemwogopa Mungu kwa kweli, hiyo ndiyo hofu pekee anayohitaji kuwa nayo maishani.

Kuelewa Hofu ya Bwana

Katika kufafanua hofu ya Bwana nataka kwanza nionyeshe aina nne za hofu ambazo sio kumcha Bwana.

1. Hofu ya kiasili

Kuna hali fulani ambapo ni jambo la kawaida kabisa kuhisi hofu. Kwa mfano, mtu anaendesha gari barabarani na tairi linapasuka ghafla. Gari linaacha njia na kuingia mtaroni. Ni jambo la kawaida kwa mtu kuhisi hofu katika hali kama hiyo. Hii si hofu ya Bwana, lakini pia si hofu mbaya. Kwa kweli, aina hii ya hofu ni ya kujilinda. Hofu na maumivu ni vifaa viwili ambavyo Mungu ameviweka ndani ya mwanadamu kumlinda.Kwa mfano, ukiweka mkono wako ndani ya maji ya moto, maumivu utakayoyahisi yatakufanya uutoe mkono wako mara moja. Kama kusingekuwa na maumivu, mkono wako ungeungua vibaya. Vivyo hivyo, kuna maumivu ya kiasili na hofu ya kiasili ambayo ni taratibu za ulinzi alizoweka Mungu ndani yetu.

2. Hofu ya kishetani

Timotheo wa pili 1:7 inasema, “Maana Mungu hakutupatia roho ya woga.” Alama ya roho hiyo ya hofu inaelezewa katika 1 Yohana 4:18:“hofu inahusika na adhabu.”Pepo wa hofu humtesa mtu; lakini hofu ya Bwana haiwezi kutesa.

3. Hofu ya kidini

Hii ni hofu inayofundishwa na wanadamu, sio ile inayotokana na ufunuo wa Mungu. Isaya 29:13 inasema, “Bwana asema: “Watu hawa hunikaribia kwa vinywa vyao na kuniheshimu kwa midomo yao, lakini mioyo yao iko mbali nami. Ibada yao kwangu inatokana na maagizo waliyofundishwa na wanadamu.” Hii ndiyo hofu niliyokuwa nayo kwa miaka mingi — hofu ambayo wengi wetu tuliokulia kanisani tunaifahamu. Ni hofu ya kufanya jambo lisilo “la kidini.” Tumelelewa kuamini kwamba tabia fulani ndiyo inayofaa kanisani, na nyingine siyo. Kwa mfano, kwa miaka mingi nilidhani ni dhambi kukohoa, kuongea kwa sauti, au kuonyesha furaha kanisani!

Sifa nyingine ya hofu ya kidini ni kwamba inataka kudumisha hali ilivyo. Yesu aliwakemea viongozi wa kidini wa siku zake kwa sababu walikataa kutambua kile Mungu alichokuwa akifanya katikati yao — waliogopa mabadiliko ambayo yangewalazimisha kubadilisha mwenendo wao.

4. Hofu ya mwanadamu

Aina hii ya hofu inatajwa katika Mithali 29:25: "Kuwaogopa watu huwa ni mtego, bali yeyote amtumainiaye Bwana atakuwa salama." Angalia tofauti ilivyo wazi: Ukimwogopa mwanadamu, humtumainii Bwana; Ukimtumainia Bwana, huna haja ya kumwogopa mwanadamu. “Kuwaogopa waogopa watu huwa ni mtego.”

Mara kwa mara, wahudumu huja kwangu na kusema, “Ndugu Prince, ninabatizwa katika Roho Mtakatifu. Hata nina karama za Roho, lakini kwa namna fulani nimefungwa.” Na mimi huwajibu, “Huenda ni hofu ya mwanadamu! Unaogopa kile baraza lako litasema; kile sinodi yako itafikiri; kile wazee wa kanisa watakifanya; au kile washiriki wako watasema." Petro alisema, “Imetupasa kumtii Mungu kuliko wanadamu” (Matendo 5:29). Wakati ambapo kuna uchaguzi ulio wazi kati ya kumtii Mungu au mwanadamu, uamuzi tayari umewekwa wazi katika Neno la Mungu. Hapo hakuna tatizo la kuchagua. Kwa maoni yangu, angalau nusu ya watu wa Mungu leo hawako huru kabisa, kwa sababu bado wamefungwa na hofu ya mwanadamu.

Tumeona kwamba hofu ya kiasili, hofu ya kishetani, hofu ya kidini, na hofu ya mwanadamu ni aina nne za hofu ambazo si hofu ya Bwana.Katika barua yangu ijayo, tutaangalia kwa undani hofu ya Bwana ni nini.