និស្ស័យរបស់កូនចៀម

នៅក្នុងការសិក្សាអំពីអ្វីដែលព្រះគម្ពីរបានបើកសម្ដែងទាក់ទងនឹងគ្រាចុងក្រោយបង្អស់ វាប្រហែលជាមិនអាចកំណត់បានយ៉ាងច្បាស់លាស់អំពីលំដាប់ ឬលក្ខណៈនៃព្រឹត្តិការណ៍ទាំងអស់ដែលបានទាយទុកជាមុននោះទេ។ ទោះជាយ៉ាងណាក៏ដោយ បើយើងពិចារណាពីអ្វីៗទាំងអស់ដែលកំពុងកើតឡើងនៅជុំវិញពិភពលោកសព្វថ្ងៃនេះ វាពិតជារឿងល្ងង់ខ្លៅណាស់ ប្រសិនបើយើងមិនអើពើនឹងអ្វីដែលព្រះគម្ពីរបានបង្ហាញដល់យើង។

ជារួម មានពាក្យគន្លឹះមួយដែលជួយឱ្យយើងយល់ និងមើលឃើញយ៉ាងច្បាស់អំពីកម្លាំងអាក្រក់ទាំងអស់ដែលបានបញ្ចេញសកម្មភាពនៅក្នុងគ្រាចុងក្រោយនេះ។ ពាក្យនោះគឺ «អាទទឹងនឹងព្រះគ្រីស្ទ»។

ការបោកបញ្ឆោតដែលនឹងមកដល់

នៅក្នុងកេរដំណែលនៃសេចក្ដីបង្រៀនទាំងបីផ្នែក ដែលមានចំណងជើងថា ពេលវេលានៃការសម្រេចចិត្ត យើងកំពុងពិនិត្យមើលយ៉ាងយកចិត្តទុកដាក់ អំពីផលវិបាកដ៏ធ្ងន់ធ្ងរនៃការលេចឡើងរបស់អាទទឹងនឹងព្រះគ្រីស្ទ (សត្វសាហាវ) និងឥទ្ធិពលដែលវានឹងមានមកលើយើងជាអ្នកជឿ ព្រមទាំងលើពិភពលោកទាំងមូលផងដែរ។ នៅក្នុងលិខិតទីមួយរបស់ខ្ញុំ ដែលមានចំណងជើងថា និស្ស័យរបស់សត្វសាហាវ ខ្ញុំបានបង្ហាញរូបភាពតាមព្រះគម្ពីរថា អាទទឹងនឹងព្រះគ្រីស្ទ ជាបុគ្គលប្រភេទណា ហើយពីរបៀបដែលវានឹងប្រតិបត្តិការ និងអ្វីដែលវានឹងធ្វើ។

នៅក្នុងមេរៀន និស្ស័យរបស់កូនចៀម ដែលជាលិខិតទីពីរនៃស៊េរីមេរៀនរបស់យើងនេះ យើងនឹងពិចារណាអំពីអង្គមួយទៀត ដែលមាននិស្ស័យផ្ទុយស្រឡះពីអាទទឹងនឹងព្រះគ្រីស្ទ។ តាមរយៈទស្សនៈនៃព្រះគម្ពីរ យើងនឹងឃើញថា ភាពផ្ទុយគ្នារវាងបុគ្គលទាំងពីរនេះ បង្កឲ្យមានសង្គ្រាមរវាងអំណាចខាងវិញ្ញាណពីរ៖ គឺវិញ្ញាណរបស់សត្វសាហាវ (សាតាំង) និងព្រះវិញ្ញាណរបស់កូនចៀមនៃព្រះ (ព្រះយេស៊ូវគ្រីស្ទ)។

ជម្លោះនេះនឹងនាំឲ្យពិភពលោកទាំងមូល ព្រមទាំងម្នាក់ៗក្នុងចំណោមយើងផ្ទាល់ ប្រឈមមុខនឹងពេលវេលាដ៏សំខាន់នៃការសម្រេចចិត្ត៖ គឺជាជម្រើសរវាងនិស្ស័យរបស់កូនចៀម ឬនិស្ស័យសត្វសាហាវ។ ដូច្នេះវាមានសារៈសំខាន់យ៉ាងខ្លាំង ដែលយើងត្រូវពង្រឹងសមត្ថភាពរបស់យើង ក្នុងការបែងចែកឲ្យដឹងច្បាស់រវាងនិស្ស័យទាំងពីរនេះ។ នោះហើយជាគោលបំណងនៃសេចក្ដីបង្រៀនអំពី ពេលវេលានៃការសម្រេចចិត្តនេះ។

គូប្រជែងដ៏ខ្លាំងក្លា

គួរឱ្យចាប់អារម្មណ៍ណាស់ដែលយើងសង្កេតឃើញថា នៅក្នុងការបើកសម្ដែងអំពីកូនចៀម និងការបើកសម្ដែងអំពីសត្វសាហាវ មានភាពស្របគ្នាមួយបែប ដែលអាចហៅថា «តុល្យភាពតាមព្រះគម្ពីរ»។ នៅក្នុងកណ្ឌគម្ពីរវិវរណៈ ពាក្យថា “កូនចៀម” ត្រូវបានរៀបរាប់ចំនួន ២៨ ដង ខណៈដែលពាក្យ “សត្វសាហាវ” ត្រូវបានរៀបរាប់ចំនួន ៣៥ ដង។ លើសពីនេះទៅទៀត នៅក្នុងព្រះគម្ពីរសញ្ញាថ្មីជាភាសាក្រិក ពាក្យ “កូនចៀម” គឺ arnion ខណៈដែលពាក្យ “សត្វសាហាវ” គឺ therion។ ពាក្យទាំងពីរនេះមានទម្រង់ស្រដៀងគ្នាខ្លាំង។

ហេតុអ្វីបានជាតុល្យភាពតាមព្រះគម្ពីរនេះមានសារៈសំខាន់? ពីព្រោះរាល់ពាក្យដែលពិពណ៌នាអំពីនិស្ស័យរបស់សត្វសាហាវ សុទ្ធតែមានលក្ខណៈផ្ទុយស្រឡះទៅក្នុងនិស្ស័យរបស់កូនចៀម ជាលក្ខណៈដែលយើងគួរជ្រើសរើសយក។ នៅពេលយើងសិក្សាកាន់តែស៊ីជម្រៅអំពីនិស្ស័យរបស់កូនចៀម យើងនឹងឃើញថា និស្ស័យរបស់ទ្រង់ផ្ទុយទាំងស្រុងនឹងនិស្ស័យរបស់សត្វសាហាវ។ តាមនិស្ស័យរបស់វា សត្វសាហាវគឺមានពេញដោយ ល្បិចកល ការបោកបញ្ឆោត ក្រអឺតក្រទម អួតអាង សាហាវឃោរឃៅ ឥតមេត្តាករុណា ក្បត់ ចូលចិត្តសម្លាប់ ផ្ដាច់ការនិយម និងចូលចិត្តត្រួតត្រាលើអ្នកដទៃ។

កូនចៀមនៃព្រះ

នៅក្នុងជំពូកទី១នៃដំណឹងល្អយ៉ូហាន យើងឃើញការណែនាំអំពីកូនចៀមដ៏ស្រស់ស្អាត ដោយលោកយ៉ូហានបាទីស្ទ ដែលព្រះបានចាត់ឲ្យមកមុនព្រះយេស៊ូវ ដើម្បីរៀបចំផ្លូវថ្វាយទ្រង់។ តើលោកយ៉ូហាន បានណែនាំអំពីទ្រង់យ៉ាងដូចម្ដេច? គាត់បានហៅព្រះយេស៊ូវថា កូនចៀមនៃព្រះ៖

“លុះស្អែកឡើង [យ៉ូហានបាទីស្ទ] ឃើញព្រះយេស៊ូវ ដែលទ្រង់កំពុងតែយាងមកឯគាត់ នោះក៏ពោលថា នុ៎ះន៏ កូនចៀមនៃព្រះ ដែលដោះបាបមនុស្សលោក” (យ៉ូហាន 1:29)។

តើព្រះនាមដ៏ពិសេសនេះ ប្រាប់យើងអ្វីខ្លះអំពីព្រះយេស៊ូវ?

កូនចៀមបុណ្យរំលង

សម្រាប់ជនជាតិអ៊ីស្រាអែលគ្រប់រូបដែលកំពុងស្ដាប់លោកយ៉ូហាននៅថ្ងៃនោះ ពាក្យ “កូនចៀម” គឺបានបង្ហាញរូបភាពនៃភាពស្លូតបូត និងសុភាពរាបសា។ កូនចៀមគ្មានក្រញាំ ឬក្រចកមុតស្រួចសម្រាប់វាយប្រហារឡើយ ហើយវាក៏មិនតដៃការពារខ្លួនផងដែរ។ ទាំងរូបរាង និងអាកប្បកិរិយារបស់វា បង្ហាញពីភាពគ្មានទោស និងភាពបរិសុទ្ធ។ សំខាន់ជាងនេះទៅទៀត កូនចៀមដែលឥតខ្ចោះមានទំនាក់ទំនងយ៉ាងជិតស្និទ្ធនឹងបុណ្យរំលង។ នៅក្នុងពេលនោះ ការជំនុំជម្រះរបស់ព្រះបាន “រំលង” ជនជាតិអ៊ីស្រាអែល ពីព្រោះឈាមរបស់កូនចៀមដ៏ឥតទោស ត្រូវបានលាបនៅលើធ្នឹមទ្វារ និងក្របទ្វារផ្ទះរបស់ពួកគេ។

ពីព្រោះព្រះយេហូវ៉ាទ្រង់នឹងយាងកាត់ស្រុក ដើម្បីវាយពួកសាសន៍អេស៊ីព្ទ កាលណាទ្រង់ទតឃើញឈាមប្រឡាក់នៅធ្នឹម ហើយនឹងក្របទ្វារទាំងសងខាង នោះទ្រង់នឹងរំលងហួសទ្វារនោះទៅ មិនឲ្យមេបំផ្លាញចូលវាយក្នុងផ្ទះអ្នករាល់គ្នាទេ។ (និក្ខមនំ 12:23)

ស្ងៀមស្ងាត់នៅចំពោះមុខអ្នកកាត់រោមចៀម

នៅពេលព្រះយេស៊ូវឈរនៅចំពោះមុខក្រុមប្រឹក្សាជាន់ខ្ពស់ ទ្រង់មិនបានការពារអង្គទ្រង់តាមរបៀបណាមួយឡើយ ទោះបីជាពួកគេកំពុងស្វែងរកមធ្យោបាយដើម្បីប្រហារជីវិតទ្រង់ក៏ដោយ៖

ឯសម្ដេចសង្ឃ ក៏ឈរឡើងនៅកណ្ដាលជំនុំ ដណ្ដឹងសួរព្រះយេស៊ូវថា តើឯងមិនព្រមឆ្លើយសោះឬអី សេចក្ដីដែលគេចោទប្រកាន់ឯងទាំងប៉ុន្មាននេះ តើយ៉ាងដូចម្ដេច តែទ្រង់នៅតែស្ងៀម មិនបានឆ្លើយអ្វីសោះ រួចសម្ដេចសង្ឃពិចារណាសួរទ្រង់ទៀតថា តើឯងជាព្រះគ្រីស្ទ ជាព្រះរាជបុត្រានៃព្រះដ៏មានពរ ឬអី។ ម៉ាកុស 14:60-61

ដូចគ្នានេះដែរ ព្រះយេស៊ូវក៏នៅស្ងៀមស្ងាត់នៅចំពោះមុខលោកពីឡាត់ផងដែរ៖

ឯពួកសង្គ្រាជ គេចោទប្រកាន់ទ្រង់ខ្លាំងណាស់ នោះលោកពីឡាត់ក៏ពិចារណាសួរទ្រង់ម្ដងទៀត ដោយពាក្យថា តើអ្នកមិនព្រមឆ្លើយសោះទេឬអី មើល រឿងជាច្រើនទាំងម្ល៉េះ ដែលគេធ្វើបន្ទាល់ទាស់នឹងអ្នក តែព្រះយេស៊ូវទ្រង់ឥតមានឆ្លើយអ្វីទៀតសោះ បានជាលោកពីឡាត់ក៏អស្ចារ្យក្នុងចិត្ត។ ម៉ាកុស 15:3-5

នេះហើយជាកូនចៀមនៃព្រះ ដែលស្ងៀមស្ងាត់នៅចំពោះមុខអ្នកកាត់រោមរបស់វា ដូចដែលហោរា អេសាយ បានទាយទុកជាមុនថា៖

ទ្រង់ត្រូវគេសង្កត់សង្កិន ហើយធ្វើទុក្ខ តែទ្រង់មិនបានហើបព្រះឱស្ឋសោះ គឺដូចជាកូនចៀមដែលគេដឹកទៅសម្លាប់ ហើយដូចជាចៀមដែលគនៅចំពោះពួកអ្នកកាត់រោមយ៉ាងណា ទ្រង់ក៏មិនបានហើបព្រះឱស្ឋសោះយ៉ាងនោះដែរ។ អេសាយ 53:7

កាលពីច្រើនឆ្នាំមុន ខ្ញុំបានធ្វើការនៅកសិដ្ឋានមួយដែលមានហ្វូងចៀមជាច្រើន។ នៅពេលគេដឹកកូនចៀមទៅកាន់កន្លែងកាត់រោម វានឹងបន្លឺសំឡេងពេញផ្លូវ។ ប៉ុន្តែ នៅពេលអ្នកកាត់រោមចាប់ផ្ដើមកាត់រោមរបស់វា កូនចៀមនោះក៏ស្ងៀមស្ងាត់ទាំងស្រុង។ ព្រះគម្ពីរពិតជាពិពណ៌នាបានយ៉ាងត្រឹមត្រូវ និងល្អឥតខ្ចោះមែន!

គំរូនៃកូនចៀម

លក្ខណៈដ៏បរិសុទ្ធ ស្លូតបូត និងសុភាពរាបសារបស់ព្រះយេស៊ូវ ក្នុងនាមជាកូនចៀមនៃព្រះ គឺជាគំរូ និងជាលំនាំដែលយើងត្រូវរៀនដើរតាមនៅក្នុងជីវិតរបស់យើង ដោយមានជំនួយពីព្រះវិញ្ញាណបរិសុទ្ធរបស់ទ្រង់។ នេះគឺជាការដាស់តឿនរបស់លោកពេត្រុស៖

ដ្បិតទ្រង់បានហៅអ្នករាល់គ្នា មកឯសេចក្ដីនោះឯង ពីព្រោះព្រះគ្រីស្ទក៏បានរងទុក្ខជំនួសយើងដែរ ទាំងទុកដំរាប់ឲ្យយើងរាល់គ្នាដើរតាមលំអានដាននៃទ្រង់ ទ្រង់មិនបានធ្វើបាបអ្វីសោះ ក៏មិនឃើញមានកិច្ចកលអ្វីនៅព្រះឱស្ឋទ្រង់ឡើយ កាលគេបានជេរប្រមាថដល់ទ្រង់ នោះទ្រង់មិនបានជេរតបវិញទេ ខណៈដែលទ្រង់រងទុក្ខ នោះក៏មិនបានគំហកកំហែងដល់គេដែរ គឺបានប្រគល់ព្រះអង្គទ្រង់ទៅព្រះ ដែលជំនុំជំរះដោយសុចរិតវិញ។ (១ ពេត្រុស 2:21-23)

សត្វព្រាប

លក្ខណៈដូចជាកូនចៀមនេះ ក៏អាចភ្ជាប់ជាមួយសត្វមួយទៀតដែរ គឺព្រាប។ នៅពេលលោកយ៉ូហានបាទីស្ទ បានធ្វើបុណ្យជ្រមុជទឹកឲ្យព្រះយេស៊ូវនៅទន្លេយ័រដាន់ គាត់បានឃើញព្រះវិញ្ញាណយាងចុះមកសណ្ឋិតលើព្រះយេស៊ូវ ដូចជាព្រាប។ ភ្លាមនោះ លោកយ៉ូហានក៏បានប្រកាសថា ព្រះយេស៊ូវគឺជា កូនចៀមនៃព្រះ។

សត្វព្រាបមិនគ្រាន់តែចុះមកសណ្ឋិតលើព្រះយេស៊ូវមួយភ្លែតប៉ុណ្ណោះទេ ប៉ុន្តែគឺសណ្ឋិតនៅជាប់នឹងទ្រង់៖

យ៉ូហានក៏ធ្វើបន្ទាល់ថា ខ្ញុំបានឃើញព្រះវិញ្ញាណយាងចុះពីលើមេឃ មានរូបដូចជាព្រាប មកសណ្ឋិតលើទ្រង់។ (យ៉ូហាន 1:32)

ព្រះយេស៊ូវមិនដែលធ្វើអ្វីមួយដែលបណ្ដាលឲ្យសត្វព្រាបហើរចេញពីទ្រង់ឡើយ។ រឿងនេះក៏ត្រូវតែពិតសម្រាប់អ្នក និងខ្ញុំដែរ។ ប្រសិនបើយើងចង់ឲ្យការចាក់ប្រេងតាំងនៃព្រះវិញ្ញាណបរិសុទ្ធស្ថិតនៅលើយើង នោះយើងត្រូវតែបន្តរស់នៅដោយមាន និស្ស័យរបស់កូនចៀមជានិច្ច។ ប្រសិនបើយើងបង្ហាញតែនិស្ស័យរបស់មនុស្សចាស់របស់យើង នោះព្រះវិញ្ញាណបរិសុទ្ធ (ដែលតំណាងដោយព្រាប) នឹងមិនសណ្ឋិតលើយើងឡើយ។ ប៉ុន្តែ បើទ្រង់ឃើញនិស្ស័យនៃកូនចៀមនៅក្នុងយើង ទ្រង់នឹងយាងមកសណ្ឋិតលើយើង។ ហើយប្រសិនបើយើងបន្តរស់នៅ និងប្រព្រឹត្តដោយនិស្ស័យរបស់កូនចៀម នោះព្រះវិញ្ញាណបរិសុទ្ធនឹងគង់នៅជាប់នឹងយើង។

តម្រូវការសំខាន់បំផុតរបស់យើង

តាមនិស្ស័យរបស់កូនចៀម និងសត្វព្រាបមិនប្រយុទ្ធតបតឡើយ។ ពួកវាស្លូតបូត សុភាពរាបសា និងស្រឡាញ់សេចក្ដីសុខសាន្ត។ ក្នុងនាមជាគ្រីស្ទបរិស័ទ យើងត្រូវរៀនពីគំរូនេះ។ ជាញឹកញាប់ ខ្ញុំឮមនុស្សអធិស្ឋានសុំ “អំណាច” ហើយខ្ញុំក៏អរព្រះគុណដល់ព្រះសម្រាប់អំណាចដ៏អស្ចារ្យនៃព្រះវិញ្ញាណបរិសុទ្ធដែរ។ ប៉ុន្តែ អំណាចមិនមែនជាអ្វីដែលយើងត្រូវការជាងគេនោះទេ។ សេចក្ដីត្រូវការដ៏សំខាន់បំផុតរបស់យើង គឺនិស្ស័យរបស់កូនចៀម។ តើយើងឲ្យតម្លៃដល់និស្ស័យនេះខ្ពស់គ្រប់គ្រាន់ហើយឬនៅ? គួរឲ្យស្ដាយ ខ្ញុំគិតថាមិនទាន់ទេ។ តាមពិត សេចក្ដីពិតអំពីនិស្ស័យរបស់កូនចៀមនេះ ស្ទើរតែត្រូវបានគេបំភ្លេចចោលនៅក្នុងផ្នែកជាច្រើននៃពួកជំនុំ។

សូមអនុញ្ញាតឲ្យខ្ញុំរំឭកអ្នកម្ដងទៀតថា ម្នាក់ៗក្នុងចំណោមយើងត្រូវតែធ្វើការសម្រេចចិត្ត។ ថ្ងៃនេះ យើងត្រូវសម្រេចថា តើនិស្ស័យមួយណានឹងគ្រប់គ្រងជីវិតរបស់យើង។ នៅពេលអាទទឹងនឹងព្រះគ្រីស្ទបង្ហាញខ្លួនជាសាធារណៈ នោះវានឹងយឺតពេលហើយក្នុងការផ្លាស់ប្ដូរចិត្ត។ វិញ្ញាណរបស់អាទទឹងនឹងព្រះគ្រីស្ទកំពុងតែធ្វើការយ៉ាងសកម្ម ដើម្បីគ្រប់គ្រងមនុស្សជាតិទាំងមូល។ ប្រសិនបើយើងមិនខិតខំបណ្ដុះនិស្ស័យរបស់កូនចៀមនៅក្នុងជីវិតរបស់យើងទេ នោះយើងនឹងស្ថិតនៅក្រោមអំណាចរបស់សត្វសាហាវ។ យើងមានជម្រើសតែពីរប៉ុណ្ណោះ៖ កូនចៀម ឬសត្វសាហាវ។

ចុះអ្នកវិញ?

យើងកំពុងរស់នៅក្នុងសម័យកាលមួយ ដែលនិស្ស័យរបស់កូនចៀម ផ្ទុយស្រឡះពីវប្បធម៌នៃពិភពលោកសព្វថ្ងៃ។ ខ្ញុំសង្ស័យថា ប្រហែលជាមិនធ្លាប់មានសម័យណាមួយដែលវប្បធម៌របស់មនុស្ស ផ្ទុយទាំងស្រុងនឹងនិស្ស័យរបស់កូនចៀមដូចសព្វថ្ងៃនេះទេ។ សូមសួរខ្លួនអ្នកនូវសំណួរនេះ៖ តើខ្ញុំកំពុងបណ្ដុះលក្ខណៈនៃភាពស្លូតបូត ភាពបរិសុទ្ធ និងភាពឥតទោសនៅក្នុងជីវិតរបស់ខ្ញុំដែរឬទេ? ប្រហែលជានៅពេលនេះ អ្នកបានដឹងថា អ្នកត្រូវការប្ដេជ្ញាចិត្តទទួលយកនិស្ស័យរបស់ព្រះយេស៊ូវ ដែលជាកូនចៀមនៃព្រះ។ ប្រសិនបើដូច្នោះ សូមអធិស្ឋានជាមួយខ្ញុំដូចតទៅ៖