Jiki mai Ƙasƙanci

Saʻad da mutum ya yi wa Allah tawaye, ya shafi komai game da shi. Kalmar da aka yi amfani da ita a cikin Littafi Mai Tsarki domin bayyana wannan yanayin ita ce lalacewa. Ya shafi kowane fanni na halayen ɗan adam - ruhaniya, ɗabi'a, da jiki. Mutuwa ita ce ƙarshen lalacewa ta jiki. Bulus ya ce:

"To, kamar yadda zunubi ya shigo duniya ta dalilin mutum ɗaya, zunubi kuwa shi ya jawo mutuwa, ta haka mutuwa ta zama gado ga kowa, domin kowa ya yi zunubi" (Romawa 5:12)

Ta wurin zunubi, gubar lalacewa ta shige mu. 1 Korintiyawa 15:56 ta fada mana, "Ai zunubi shi ne Ƙarin mutuwa." Kamar yadda ƙudan zuma ko ƙwaro ke shigar da dafinsa cikin jiki ta wurin ƙarinsa, haka nan Shaiɗan ke shigar da gubar lalacewa da mutuwa ta ƙarin zunubi.

Duk mun zama gurɓatattun halittu. A cikin Filibiyawa 3:21, Bulus ya kira jikunanmu na yanzu "jiki mai ƙasƙanci". An ƙasƙantar da mu saboda mun yi wa Mahaliccinmu tawaye. Ko da yaya muke da kyau, lafiya, ƙarfi, arziki, ko shahara, muna rayuwa cikin jiki mai ƙasƙanci ne. Za mu iya cin abinci mafi kyau kuma mu sha abin sha mafi daɗi, amma dole mu je masai. Za mu iya zama masu ƙarfi da lafiya, amma idan muka ji zafi kaɗan, sai mu fara gumi. Ko muna da wadata ko mu talakawa ne, duk muna yin gumi. Waɗannan abubuwa da ke cikin jiki suna tunasar da mu cewa dukanmu 'yan tawaye ne kuma masu laifi waɗanda jikinsu ya zama mai lalacewa.

Na shafe shekaru biyar ina horar da malaman Afirka, na yi sha'awar ƙwarewarsu ta wasanni. Nakan fada wa waɗannan ƙarfafan samari, "Ku tuna, sauro ɗan ƙaramin kwaro zai iya zuwa ya saka maku kwayoyin cuta, sai ku kama rawar sanyi da zazzaɓi." Wannan shi ne jikinmu mai ƙasƙanci. Labari mai daɗi shi ne cewa Yesu ya mutu domin ya fanshe mu - ba wai rayukanmu kawai ba. Ya fanshi mutum gaba daya - jiki, rai, da ruhu.