Hadaya Mai Rai

"Don haka ina roƙonku 'yan'uwa, saboda yawan jinƙai na Allah, ku miƙa jikkunanku hadaya rayayyiya, tsattsarka, abar karɓa ga Allah, domin wannan ita ce ibadar ku ta ainihi." (Romawa 12:1, Sabuwar Hausa)

A cikin surorin farko na Romawa, an gabatar mana da tauhidi mai girma. Aiwatarwar ta fara ne da jikkunan mu: Za mu miƙa jikunan mu ga Allah a matsayin hadaya mai rai.

Muna iya tunani cewa, Jiki ba shi da wani muhimmanci; rai ne ke da muhimmanci. Amma bari mu mori misali na zahiri: Idan na roƙi kofin ruwa, sai na sami kofin da abin da ke ciki. Ba zan iya samun ruwan ba tare da kofin ba. Wannan ne abin da Allah yake faɗa. Yana son mazubi, wato, jikin—da abin da ke ciki, wato, rai. Ba za mu iya bayar da abin da ke ciki ba tare da mazubin ba.

Me ake nufi da mu miƙa jikkunan mu "hadaya mai rai”...? Hadayun Tsohon Alƙawari dabbobi ne da ake yankawa, sannan a dora su bisa bagadi. Allah ya ce, "Ina buƙatar jikinka gaba ɗaya kamar hadayun Tsohon Alƙawari, amma da bambanci guda ɗaya. Ba na son jikinka a mace amma rayayye. Idan na sami jikinka, to, na same ka."

A cikin Matta 23, Yesu yana magana da Farisiyawa, yana bayyana abin da ya fi muhimmanci a hidimarsu ga Allah. Sai suka ce hadaya ta fi bagadi muhimmanci. Yesu ya ce:

"Ku makafi! Wanne ya fi girma, sadakar ko kuwa bagadin hadayar da take tsarkake sadakar?" (Matta 23:19)

Bagadi yana tsarkake hadayar da aka ɗora a kansa. Ana tsarkake hadayar ta hanyar ɗora ta a kan bagadin Allah. Haka yake ga jikunanmu. Idan muka dora jikunan mu a kan bagadin Allah, za su zama tsarkakakku. An tsarkake su, an keɓe su ga Allah. Aiki ne da kowannenmu zai yi.