Sarayar da Rayukanmu

Domin mu ɗanɗana cikakken tasirin jinin Yesu, muna buƙatar sanin yadda za mu mori jininsa. Nassin yau da kuma furucin wannan makon suna nuni ga babban rikici na ƙarshen zamani wanda ya shafi sama da ƙasa - mala'ikun Allah, Shaiɗan da mala'ikunsa, da mutanen Allah masu bada gaskiya a duniya. Mala'ikun Allah ne suka yi wannan furucin:

"Sun kuwa yi nasara da shi albarkacin jinin Ɗan Ragon nan, da kuma albarkacin maganar da suka shaida, domin ba suyi tattalin ransu ba har abin ya kai su ga mutuwa" (Wahayin Yahaya 12:11)

"Su" mutane ne kamar ni da kai, masu bangaskiya ga Yesu Kristi. "Shi" yana nufin Shaiɗan. Akwai faɗa na kai tsaye tsakaninmu da Shaiɗan; babu kowa a tsakani. Wannan ayar ta gaya mana yadda Masu Bi suka yi nasara da shi, ta ƙara bayyana su a matsayin masu jajircewa - jajircewa sosai. Krista mai jajircewa shi ne irin wanda ke firgata Shaiɗan. Aka ce "ba su yi tattalin rayukansu ba har abin ya kai su ga mutuwa," yana nufin cewa rayuwarsu ba ita ce suka sa gaba ba. Abu na farko da ya fi muhimmanci shi ne su kasance masu aminci ga Ubangiji da kuma yin nufinsa.

Lokacin da muke magana a kan "sojoji a cikin rundunar Ubangiji," da yawa daga cikinmu suna da ra'ayi na son zuciya game da abin da hakan yake nufi. Lokacin da nake soja a rundunar sojojin Birtaniya, ban sami takardar shaida daga kwamandan mai tabbatar da cewa ba zan rasa raina ba. Kowane soja ya san za a iya kashe shi; zai iya mutuwa a bakin aiki. Haka yake a cikin rundunar Ubangiji. Babu tabbacin cewa ba za mu rasa rayukanmu ba. Mutanen da Shaidan ke tsoro su ne waɗanda ba sa jin tsoron sarayar da rayukansu. A karshe duka, rayuwa a duniya takaitatta ce.