Muhimmancin Jibi

Mun lura cewa rai yana cikin jini (dubi Littafin Firistoci 17:11). Idan muna son rai, dole ne mu amince da jinin. Za mu yi haka ta hanyar Cin Jibi, da kuma shaidar mu.

A gare ni, wannan batun Cin Jibin ya zama mai matuƙar muhimmanci. Bulus ya ɗauko maganar Yesu a cikin 1 Korintiyawa 11:25, yana cewa:

"Ku yi haka duk sa’ad da kuke shan shi, domin tunawa da Ni."

Ikkilisiyu da yawa suna tunani yana cewa, "Ba akai-akai ba." Wasu daga cikin sujadu mafi ƙayatarwa da na taɓa halarta sune na shan Jibi; suna da kyau sosai saboda sun riƙe wannan gaskiyar.

A wani lokaci, uwargida ta, Ruth, da ni mun gano cewa ba ma shan jibi yadda ya kamata. A matsayina na firist na gidanmu, sai na yanke shawarar cewa za mu rika shan jibi kowace safiya a lokacin da muka zo gaban Ubangiji. Ban ce kowane Krista ya yi haka ba, amma ina godiya saboda mun yi hakan. Da mun yi watsi da shi da mun ji cewa wani abu ya ragu a rayuwarmu.

Kowace rana, idan muka sha jibi sai mu ce, "Muna karɓar wannan gurasar a matsayin namanka, Ubangiji, wannan ruwan inabi kuma a matsayin jininka." Nakan yi haka ta hanya mai sauƙi, ta musamman, ina cewa, "Ya Ubangiji, muna yin haka ne domin tunawa da Kai; muna shelar mutuwarka har lokacin zuwanka." A shan jibi, babu abin da za mu duba na rayuwar da ta wuce sai giciye, ba kuma rayuwar gaba ba sai dai zuwan Yesu. Muna yin hakan ne domin tunawa da giciye har Yesu ya dawo. Bari wannan ya sa mu yi la'akari ko da gaske muna miƙa kanmu ga rayuwar da ke cikin jinin.