Ɗaukakar da Za a Bayyana

"Ai, a ganina, wuyar da muke sha a wannan zamani, ba ta isa a kwatanta ta da ɗaukakar da za a bayyana mana ba [a lokacin tashi daga matattu]. Ga shi, duk halitta tana marmari tana ɗokin ganin bayyanar 'ya'yan Allah." (Romawa 8:18–19)

Krista da yawa ba su fahimci muhimmancin tashin Kristi daga matattu a gare mu ba. Za a bayyana 'ya'yan Allah a lokacin tashin matattu; dukan halitta tana jira. Itatuwa, tekuna, koguna, da duwatsu duk suna jira. Abin mamaki ne cewa halitta kanta tana marmari sosai—amma kuma yawancin Ikkilisiyu basu yin hakan.

"An sarayar da halitta ta zama banza, ba da nufinta ba, amma da nufin wanda ya sarayar da ita. Duk da haka, akwai sa zuciya gama za a 'yantar da halitta da kanta ma, daga bautar rubewa, domin ta sami 'yancin nan, na ɗaukaka na 'ya'yan Allah." (ayoyi 20–21)

Dukan halitta tana shan wahala saboda zunubin mutum. Kafin mutum ya yi zunubi, babu ƙayayuwa da sarkakiya; babu abin da ya taɓa mutuwa ko ruɓewa. Za mu iya gani cewa ba mu kaɗai ne za mu shiga cikin tashin matattu mai ɗaukaka ba; har ma da halitta. Duk da haka, Allah ya bada wannan fifiko: halitta ba za ta shiga ba har sai mun shiga. Kamar yadda Bulus ya rubuta:

"Mun dai san dukan halitta tana nishi na shan azaba har ya zuwa yanzu" (aya ta 22)

Sau da dama Bulus yana amfani da kalmar "mun sani," amma yawanci Krista a yau ba su sani ba. Ko mun san cewa dukan halitta tana cikin azabar naƙuda, tana jiran bayyanar 'ya'yan Allah, lokacin haihuwar sabon zamani, da kuma kuɓutarwa daga lalacewa?