Jikina Na Ubangiji Ne

"Amma ku miƙa kanku ga Allah kamar wadanda aka raya bayan mutuwa, kuna miƙa gaɓoɓinku ga Allah kayan aikin adalci." (Romawa 6:13)

Muna miƙa wa Allah gaɓoɓinmu na zahiri kuma muna cewa, “Allah, Ka more su.” Sannan, wajibi ne mu kiyaye Haikalin da tsarki. Bulus ya rubuta:

"Jiki kam ba don fasikanci yake ba, sai dai domin Ubangiji, Ubangiji kuma domin jiki" (1 Korintiyawa 6:13)

A yau, muna kiran fasikanci "jima'i kafin aure." Amma Allah bai canza girman wannan zunubin ba. Jiki ba domin jima'i kafin aure ba ne; jiki na Ubangiji ne. Sannan kuma, "Ubangiji [na] jiki ne," shi ma. Wannan ba abin jin daɗi ba ne? Idan muka ba da jikunanmu ga Ubangiji, to, Ubangiji zai zama na jikkunanmu.

Bulus mutum ne mai gabagaɗi wanda ke faɗawa mutane gaskiyar abubuwan da suka shafe su. Ya ci gaba da cewa:

"Ku guji fasikanci. Duk sauran zunubin da mutum yake yi bai shafi jikinsa ba, amma mai yin fasikanci yana ɗaukar alhakin jikinsa ne" (aya ta 18)

Mutane da yawa suna fassara wannan nassi a matsayin gargaɗi game da cututtukan da ake ɗauka ta hanyar jima'i, kamar ƙanjamau, ciwon sanyi, ko ƙurajen gaba. Tabbas waɗannan za su iya zama sakamakon fasikanci, amma ma’anar koyarwar Bulus ta wuce nan. Muna janyo wa jikunanmu haɗari a duk lokacin da muka aikata kowace irin lalata. Sau da yawa idan Krista suka nemi warkarwa ba su samu ba, dalilin shi ne aikata lalata. A mafi yawan lokuta, Allah yana so mu koma ga tushen, mu tuba, mu daidaita kafin mu sami warkarwa daga gare Shi.