Matsawa gaba

Muna da damar yin zaɓi. Akwai abin da zai mallake mu. Wannene zai zama: zunubi ko adalci? Idan muka ce adalci, za mu yarda cewa za a gwada mu! Shaiɗan ba zai gaji ba matuƙar yana tunanin akwai damar yin nasara.

Yayin da aka gwada mutum ko aka jarabce shi, shaiɗan zai ci gaba har ya kai mutumin wurin da jarabawar za ta zama ba ta damun sa. Ba ya ma yin ko tunanin ta. Shaiɗan yana da wayo sosai ba zai ɓata lokacinsa a kan irin waɗannan mutanen ba. Amma idan muna raba hankalinmu wuri biyu, shaidan zai mori wannan damar. Dole ne mu yanke kwakkwaran mataki.

"Mai da magana nake irin ta yau da kullum, saboda rarraunar dabi’arku wato, kamar yadda da can kuka miƙa gaɓoɓinku ga bautar rashin tsarki, da mugun aiki a kan mugun aiki." (Romawa 6:19)

Idan muka zaɓi mugunta, muguntar za ta ƙaru. Za mu ƙara zama masu mugunta. Da yawa daga cikin mu za mu iya tunawa da wannan gaskiyar a rayuwarmu.

Maimakon yawaita cikin mugunta, "a yanzu sai ku miƙa gaɓoɓinku ga bautar aikin adalci, domin aikata tsarkakan ayyuka [tsarki]" (aya ta 19).

Yana da wuya a tsaya wuri guda a cikin rayuwar ruhaniya. Ko dai mu matsa gaba ko kuma mu yi baya. Ko dai mu ci gaba a cikin tsarki ko kuma mu ƙara gaba cikin tawaye.