Miƙa Kai ga Allah

Bulus ya ce:

"Saboda haka, kada ku yarda zunubi ya mallaki jikin nan naku mai mutuwa har da za ku biye wa muguwar sha'awarsa, kada kuma ku miƙa gaɓoɓinku su zama kayan aikin mugunta; don yin zunubi. Amma ku miƙa kanku ga Allah kamar waɗanda aka raya bayan mutuwa, kuna mika gaɓoɓinku ga Allah kayan aikin adalci" (Romawa 6:12–13)

An 'yantar da mu. Bai kamata zunubi ya mallaki hannayenmu, ƙafafunmu, ko harshenmu ba. Akasin haka, Bulus ya ce, sai mu miƙa kanmu ga Allah da gaɓoɓinmu a matsayin kayan aikin adalci na Allah. Akwai miƙawa iri biyu.

Da farko, mu miƙa nufinmu ga Allah ta hanyar cewa, "Ba nufina ba, sai naka nufi za a yi." A cikin Addu'ar Ubangiji, roƙo na biyu shi ne, "A aikata nufinka a duniya kamar yadda ake yi a sama" (Matiyua 6:10). Lokacin da muke yin addu'a cewa "A aikata nufinka," yana farawa ne da nufin wanda yake yin addu'ar - wanda ya yarda a aikata nufin Allah.

Da zarar muka miƙa nufinmu, za mu miƙa gaɓoɓin jikkinmu a matsayin kayan aikin adalci. A Girkanci, kalmar "kayan aiki" a zahiri tana nufin "makamai," tana nufin yaƙi na ruhaniya. Waɗannan ba kowane irin kayan aiki ba ne , kamar fartanya ko garma—kayan yaƙi ne, kamar takobi.

Baftisma cikin Ruhu Mai Tsarki ita ce matakin farko na miƙa nufinmu ga Allah; sannan sai mu miƙa wannan ɓangare mara biyayya wanda ba mu da ikon sarrafa shi: harshe. Lokacin da aka yi mana baftismar Ruhu Mai Tsarki, a nan ne muke fara cika umurnin miƙa gaɓobinmu (makamai) ga Allah a matsayin kayan aikin adalci. Haƙiƙa, yayin da muka miƙa harshenmu ga Allah kuma Ruhu Mai Tsarki ya karɓe shi, zai zama makami: a cikin addu'a, a cikin shaida, da kuma cikin wa'azi.