Kuɓuta daga Azaba

Shekaru da yawa, lokacin ina fasto a London, na sha fama da baƙin ciki mai tsanani wanda ya mamaye ni, ya nawaita mani, ya kuma rufe ni. Yana sa in ji rashin bege da gazawa. Wataƙila za ku gane hakan. Na yi yaƙi da wannan yanayin ta kowace hanyar da na sani, amma babu wani ci gaba. Sai na ci karo da Ishaya 61:3:

"Domin a kawo wa masu makoki a Sihiyona... wakar yabo maimakon bacin rai."

Yayin da nake karanta waɗannan kalmomin, Ruhu Mai Tsarki ya nuna mani, "Wannan ita ce matsalarka!" Sai haske ya shigo mani. Sai na lura cewa ba faɗa nake yi da kaina ba amma wata halitta ce—mugun ruhu ne yake azabtar da ni da kuma cutar da ni. Da na fahimci hakan, na sami aƙalla nasarar kashi 80 cikin 100. Ina buƙatar wata aya guda ɗaya kawai:

"Amma dukan waɗanda suka nemi Ubangiji za su tsira ["kuɓuta"] (Yowel 2:32)

Da na haɗa waɗannan Ayoyi guda biyu, na yi addu'a, "Allah, Ka nuna mani cewa ruhun baƙin ciki ne ke cutar da ni. na zo gare Ka yanzu, ina kiran sunan Ubangiji Yesu. Ka kuɓutar da ni." Ya 'yantar da tunanina daga wannan ruhun da ke cutar da ni.

Yanzu, ya rage nawa in shirya tunani na. Tun asali ina da miyagun tunani, waɗanda Allah ya nuna mani suna musanta bangaskiyata cikin Yesu. Ya rage gare ni in horar da tunani na. A cikin shekaru da dama, a duk lokacin da tunani marar kyau da rashin tabas su zo mani, sai in ƙi su, in kuma maye gurbinsu da furuci mai kyau daga Littafi Mai Tsarki. Bayan shekaru da dama, sai tunani na ya canza gaba ɗaya. Na zama sabon mutum gaba ɗaya.