Cika Aikin Sa

Ga waɗansu shawarwari game da yadda za ka ɗauki jikinka a matsayin haikali na Ruhu Mai Tsarki.

Da farko dai, ka darajanta jikinka domin haikalin Ruhu Mai Tsarki ne, wanda muke darajantawa. A cikin Krista na zamanin nan, na ga akwai ƙarancin darajanta jiki sosai.

Na biyu, ka nemi taimakon Ruhu Mai Tsarki wajen horar da kanka.

Na uku, ka ɗauki lokaci ka yi ƙoƙarin bambancewa tsakanin abin da ke mai amfani da mai cutarwa.

Na huɗu, ka yi shirin zama mai tsattsauran ra'ayi domin rayuwarka tana cikin haɗari.

Na biyar, ka yi ƙoƙari ka ba Ruhu Mai Tsarki haɗin kai.

Akwai matakai da yawa da zan iya ƙarawa a kan wannan jerin, amma na sami waɗannan ta hanyar ɗanɗano. Ubangiji ya ƙalubalance ni in yi la'akari ko ina yin rayuwa ta nishadi. Ubangiji ya ƙalubalance ni in dubi waɗannan tambayoyin: Ko ina son in ci gaba da rayuwa? Ko ina so in kammala aikin da aka ba ni? Yesu ya faɗawa almajiransa:

"Abincina shi ne in aikata nufin wanda ya aiko ni, in kuma cika aikinsa" (Yahaya 4:34)

Wannan shi ne abinci mafi dacewa: yin nufin Wanda ya aiko mu - mu kuma cika aikin Sa. Ko bayan da na shafe sama da shekaru hamsin cikin hidimar Ubangiji, na gaskata akwai waɗansu ayyukan da Allah ya ba ni waɗanda ban cika ba tukuna. Ban taɓa ɗaukar su da wasa a kan cewa zan cika su ba. Ina kula da jikina a kullum, domin na san muhimmancin kula da kaina a cikin kyakkyawan yanayi don kada a datse rayuwata kafin in cika aikin Allah.