Ɗaukaka Allah da Jikina

"Ashe ba ku sani ba, jikinku Haikali ne na Ruhu Mai Tsarki wanda yake a zuciyarku, wanda kuka kuma samu a gun Allah? Ai ku ba mallakar kanku ba ne? Sayenku aka yi da tamani; To, sai ku ɗaukaka Allah da jikinku." (1 Korintiyawa 6:19–20)

Akwai hanyoyi da yawa da muke amfani da jikkunan mu. Wani babban aiki shi ne kula da kanmu - ci da sha. Bulus ya ce ya kamata mu yi waɗannan ayyukan ta hanyar da Allah zai sami ɗaukaka:

"To duk abin da kuke yi, ko ci ko sha, ku yi kome saboda ɗaukakar Allah." (1 Korintiyawa 10:31)

Me ake nufi da "ci...don ɗaukakar Allah"? Na bari ka bada amsar wannan tambayar. Wasu mutane ba sa tunanin za su iya ɗaukaka Allah ta hanyar cin abinci. Amma Allah ya ce Shi Allah ne mai kishi (alal misali, dubi Fitowa 34:14), kuma Yana son a ɗaukaka shi a kowane bangare na rayuwa - musamman cikin ƙananan ayyuka na yau da kullum har zuwa sauran ayyukan duniya.

Amma bari in sake yi maka wata tambaya. Ko zai yiwu a ci fiye da kima don ɗaukakar Allah? Ban tsammanin hakan ba, da shike cin abinci fiye da kima wani nau'i ne na nishadi. Karin Magana 13:25 ta ce, "Adalai suna da isasshen abinci, amma mugaye fama suke da yunwa ko yaushe." Muna da 'yancin mi ci mu ƙoshi, amma idan muka wuce haka - fiye da buƙatunmu da suka wajaba - to, mun shiga nishaɗi kenan.