Fahimtar Fagen Yaƙi

"Ko da yake a cikin jiki muke tafiya, famarmu ba irin na mutuntaka ba ne [na jiki ko na zahiri]. Don kuwa makamanmu na fama ba na mutuntaka ba ne, na ikon Allah ne masu rushe makamai masu ƙarfi, muna ka da masu hujjoji a cikin zace-zacensu, muna rushe kowace ganuwar alfarma mai tare sanin Allah, muna kuma jan hankalin kowa ga bautar Almasihu." (2 Korintiyawa 10:3–5)

Muna yaƙi da Shaiɗan ne a duniyar ruhaniya; saboda haka, makaman su ma na ruhaniya ne kuma sun dace da duniyar yaƙin.

Yana da matuƙar muhimmanci mu fahimci inda ake yaƙin. Bulus ya mori kalmomi daban-daban a cikin 2 Korintiyawa don yin magana a kan filin yaƙin da kuma manufofinmu. A wadansu fassarori daban-daban, mun sami waɗannan kalmomi:

• Hasashe
• Hujjoji
• Zato
• Muhawara
• Sani
• Tunani

Lura cewa kowace kalma tana magana kan duniyar tunani. Dole ne mu fahimci cewa fagen yaƙin yana cikin tunaninmu. Shaiɗan yana yaƙi sosai don ya kama tunanin ɗan adam. Yana kariya da ikoki a cikin tunaninmu, kuma hakkinmu ne, a matsayin wakilan Allah, mu yi amfani da makamanmu na ruhaniya don rushe waɗannan kariya, mu 'yantar da tunanin maza da mata, sannan mu kawo su ga bauta da biyayya ga Kristi. Wannan wani babban aiki ne!

Shaiɗan yana gina katanga a cikin zukatan mutane cikin dubara da kuma tsari. Waɗannan ikoki suna adawa da gaskiyar bishara da Kalmar Allah kuma suna hana mu karɓar saƙon bishara.