Sabuntawa Ta Wurin Ruhu Mai Tsarki

Hanyar ceto ta haɗa da sabuntawa. A cikin Titus 3:5, mun karanta:

“Ya [Allah] cece mu, ba don wani aikin adalci da muka yi ba, a’a, sai dai domin jinƙan nan nasa, albakacin wankan nan na sake haihuwa da kuma sabuntawar nan ta Ruhu Mai Tsarki”

Bangare na ƙarshe da Bulus ya ambata a cikin wannan ayar shi ne sabuntawa. Dole mu zama sababbin halitta. Bulus ya ce:

“Saboda haka, duk wanda ya ke na Almasihu, sabuwar halitta ne: tsohon al’amari duk ya shuɗe, ga shi, kome ya zama sabo!” (2 Koranthiyawa 5:17)

Kalmar nan “halitta” tana da muhimmanci, domin mahalicci guda ne— wato Allah. Mutum yana iya ƙerawa, gyarawa, ko samar da abu, amma mutum ba zai iya halitta ba. Zukatanmu da dukkan abubuwan da ke cikinmu sun ƙazantu kuma sun lalace ta wurin aikin zunubi har duk wani gyara ko maho ba zai yi ba. Sai sabuwar halitta kaɗai.

A cikin Tsohon Alkawari, bayan da Dauda ya faɗa cikin zina, ya yi kisa, kuma a ƙarshe ya fuskanci mummunan halin zuciyarsa, sai ya yi kuka mai raɗaɗi zuwa ga Allah, “Ka halitta tsarkakakkiyar zuciya a cikina, ya Allah” (Zabura 51:10). Ya san cewa halittar nan dole ta fito daga wuri Allah; ba za ta iya faruwa ba ta hanyar duk wani tsari na ɗan Adam.

A cikin Littafin Titus sura 3 aya ta 5, mun ga bangarori uku na tsarin samun ceto:

1. Wanka, ko tsarkakewa;
2. Sake haihuwa, ko sabuwar haihuwa; da,
3. Sabuntawa, ko sabuwar halitta.

Allah yana yin abin da mutum ba zai iya yi ba gaba ɗaya. Duk wannan ta wurin jinƙan Allah ne, ba adalcinsa ba. Ba bisa ga ayyukan adalcinmu ba—waɗannan ba za su cim ma komai ba. Ceto dole ya fito daga jinƙai na Allah mai iko duka.