Tsarki Ta Wurin Bangaskiya

Za mu gane cewa ana samun farkawa sa’ad da mutanen Allah suka fi sha’awar zama masu tsarki fiye da samun warkarwa. Abubuwan da mu ka fi ɗauka mafi muhimmanci ba daidai ba ne. Idan zan shirya taron warkarwa, mutane za su turaro da yawa, amma idan zan koyar da batun tsarki, yawan masu halarta zai ragu. A gaskiya, tsarki ya fi warkarwa muhimmanci ƙwarai. Warkarwa na ɗan lokaci ne, kuma zai taimaka maka ne kawai a wannan rayuwar. Mun gode wa Allah da hakan. Amma tsarki na har abada ne; zai kasance tare da kai har abada a sama. Dole ne wani abu ya faru ta wurin ikon Ruhu Mai Tsarki don ya sauya yadda muke darajanta abubuwa.

“To, yanzu, ’yan’uwa, na danƙa ku ga Ubangiji, maganar alherinsa kuma ta kiyaye ku, wadda ita take da ikon inganta ku, kuma ta ba ku gādo tare da dukan tsarkaka.” (Ayyukan Manzanni 20:32)

Gādon nan na waɗanda aka tsarkake ne. Wannan ayar tana cewa Kalmar Allah na iya shigar da kai cikin wannan gādon. Amma ta yaya ake samun tsarkakewa a ƙarƙashin hanyar Allah mafi kyau, wato sabon alkawari? Yesu ne ya aiki Shawulu na Tarsus lokacin da ya fara bayyana kansa gare shi (wanda daga baya ya zama Bulus). Ya ce:

“Zan tsirar da kai daga jama’ar nan, da kuma Al’ummai, waɗanda zan aike a ka gare su, domin ka buɗe ma su ido, su juyo daga duhu zuwa haske, daga mulkin Shaiɗan zuwa wurin Allah, domin su sami gafarar zunubai, da gādo tare da dukan tsarkaka saboda sun gaskata da Ni.” (Ayyukan Manzanni 26:17–18)

Za a iya tsarkake mu ta wurin kiyaye dukan dokokin Tsohon Alkawari—idan muka kiyaye su gaba ɗaya a kowane lokaci. Amma, wannan abu ne da ba zai yiwu ga mutane masu zunubi ba. Hanyar da ta dace kuwa daban ce kwata-kwata—ba ta wurin kiyaye dokoki ba, amma ta wurin bangaskiya cikin Yesu.