Ba Tarin Dokoki Ba

Bari mu dubi yadda ake samun tsarki a ƙarƙashin tsohon alkawari. Allah ya ce, “Ku zama masu tsarki; domin Ni mai tsarki ne” (Leviticus 11:44). Dukan surar nan ta Leviticus 11 ta bayyana dokoki masu wuyar ganewa game da abin da za a ci, abin da za a sa, da abin da ke sa mutum ya zama mai tsarki ko marar tsarki.

Abin da Allah ke buƙata shi ne, “Ku tsarkake kanku” (Leviticus 11:44). Amma daga wannan babi za ku fahimci cewa kiyaye tsarki abu ne mai matuƙar wahala. Akwai jerin dokoki masu tsauri da yawa da aka shimfiɗa.

“Waɗannan ƙananan dabbobin da su ke rarrafe a ƙasa haram ne a gare ku, wato, murɗiya, da ɓera, da gafiya da irin su... da tsaka, da hawainiya, da kadangare, da guza, da damo.. Duk wanda ya taɓa su, ko ya taɓa mushen su, zai zama ƙazamtacce har zuwa maraice.” (Leviticus 11:29–31)

Bisa ga wannan dokar, misali, idan bera ya mutu kuma wani ya ɗaga shi da wutsiyarsa, wannan mutumin zai zama ƙazamtacce har zuwa maraice. Amma Littafi Mai Tsarki ya ci gaba da bayar da ƙarin dokoki game da wurin da bera zai iya faɗawa ko tufafin da zai iya taɓawa, sannan ya bayar da umurni kan yadda za a magance wannan ƙazamtuwar. Bin dukan waɗannan dokoki zai zama aiki na dukan lokaci.

Allah ya ce, idan ka yi nasara wajen bin waɗannan dokoki, za ka zama da tsarki. Amma idan kana so ka samu tsarki ta wurin kiyaye dokoki, dole ne ka kiyaye dukan dokokin a kowane lokaci. Ba za ka iya barin ko ɗaya ba ko da sau ɗaya. Amma godiya ga Allah domin Ya tanadar mana hanya mafi kyau — domin kiyaye dukan waɗannan dokoki abu ne da ba zai yiwu ga ƴan Adam masu zunubi ba.