Shirin Sa Na sa Mu Zama Masu Tsarki

Mun san cewa kalmar tsarkakewa na da alaƙa da kalmar tsarkaka, kuma tana da alaƙa kai tsaye a cikin harsunan Littafi Mai Tsarki na ainihi da kalmar “tsarki.” Don haka, tsarkakewa na nufin zama da tsarki. Allah ya yi shiri domin mu zama da tsarki.

Tsarki hali ne na musamman daga cikin halayen Allah. Allah na da halaye masu ban mamaki da yawa—ƙauna, iko, hikima, da sauransu—amma ga dukan waɗannan halayen za mu iya cewa suna bayyane cikin ’yan Adam. Mun dandana ƙauna daga ’yan Adam. Mun san waɗanda suke da iko. Muna haduwa da ’yan Adam masu hikima. Hakika, waɗannan halayen na bayyana a cikin ’yan Adam waɗanda ba su ma kai na Allah ba, amma aƙalla muna da masaniya game da waɗannan halayen. Amma idan muna magana game da tsarki, babu wani abu da za mu kwatanta shi da shi. Allah mai tsarki ne na musamman, na dabam.

Tsarki wani abu ne da ba a samunsa sai a wajen Allah. Hakika, a wasu hanyoyi za ku iya auna yawan sanin Allah ta yadda kuka san tsarki. Ina kwatanta shi da haka: Muna gode wa Allah domin alherinsa, muna yabon Allah saboda girmansa, amma muna bauta wa Allah saboda tsarkinsa. Sujada ita ce amsawar mu ga tsarkin Allah.

A cikin Tsohon Alkawari, Allah ya ce, “Za ku zama da tsarki: gama ni Mai Tsarki ne” (Leviticus 11:44), kuma, a Sabon Alkawari, Bitrus ya sake maimaita kalmomin Ubangiji, yana cewa, “Ku zama da tsarki, gama ni Mai Tsarki ne” (1 Bitrus 1:16). Amma ana magana ne akan hanyoyi guda biyu dabam dabam na samun tsarki. Zan kwatanta waɗannan hanyoyi guda biyu—ɗaya ta tsohon alkawari, ɗayan kuma ta sabon alkawari—a cikin ‘yan kwanaki masu zuwa.