An Saye Mu Gaba ɗaya

A cikin Romawa, mun karanta game da masarautu biyu da dokokinsu na aiki waɗanda suka saɓa wa juna. Shari’ar shaiɗan ita ce shari’ar zunubi da mutuwa; Shari’ar Mulkin Allah ita ce shari’ar Ruhu na rai cikin Kristi Yesu.

“Gama shari’ar Ruhu na rai cikin Kristi Yesu ta ‘yantar da ni daga shari’ar zunubi da ta mutuwa” (Romawa 8:2)

Ba mu cikin mulkin shaiɗan, ba mu kuma ƙarƙashin shari’ar shaiɗan. Mulkinsa bai shafe mu ba domin muna cikin wata masarauta. An ɗauke mu gaba ɗaya, an kai mu cikin Mulkin Allah—ruhu, rai, da jiki. Kuma an sami wannan fansar ne ta wurin jinin Yesu—an tsarkake mu, an keɓe mu domin Allah, ta wurin jinin Yesu.

Yanzu, bari mu dubi yadda abubuwan suka danganci jikin Mai Bi. Ta wurin ɗanɗano na zan iya cewa a nan ne ainihin inda abin ke fara aiki, idan muka kawo shi ga jikkunan mu. Yi la'akari da wannan:

“Ko ba ku sani ba jikinku haikali ne na Ruhu Mai Tsarki wanda ke cikin ku, wanda kuka karɓa daga wurin Allah? Ku kuwa ba na kanku ba ne; Gama an saye ku da tamani, saboda haka ku ɗaukaka Allah cikin jikin ku da ruhun ku, waɗanda na Allah ne.” (1 Korinthiyawa 6:19-20)

Kalmomin “saye da tamani” suna mayar da mu zuwa jigon fansa. An sawo mu da jinin Yesu daga hannun shaiɗan. Ɓangarori na rayuwar mu nawa ne aka saya? Ruhun mu ne kawai? A’a, ruhun mu da jikkunan mu duka na Allah ne domin Yesu ya biya fansar mu gaba ɗaya da jinin Sa.