Ɗaukewa Gaba Ɗaya

Kamar yadda adalci yake, ba a samun tsarkakewa ta wurin ƙoƙari ko ta addini ba, amma sai ta wurin bangaskiya cikin jinin Yesu kaɗai. Samun tsarkakewa shi ne a keɓe mutum domin Allah. Mu yanzu na Allah ne; muna ƙarƙashin ikon Allah kuma muna shirye domin Sa. Duk abin da ba na Allah ba, ba shi da ikon kusantar mu; jinin ne ke kawar da shi daga gare mu.

“Kuna godewa Uba, wanda ya maishe mu mu isa samun rabo cikin gadon tsarkakan da suke a cikin haske. Ya tsamo mu daga mulkin duhu, ya maishe mu ga mulkin ƙaunataccen Ɗan Sa. (Kolosiyawa 1:12–13)

Ta wurin bangaskiya cikin jinin Yesu, an tsame mu daga inda ikon Shaiɗan ya ke kuma an maishe mu cikin mulkin Allah. Kalmar nan"maishe mu" ["ɗaukewa" KJV]" na nufin "ɗaukewa daga wannan wuri zuwa wani wuri." A cikin Littafi Mai Tsarki, an yi amfani da kalmar domin ɗauka gaba ɗaya daga wani wuri zuwa wani. A cikin Tsohon Alkawari, akwai mutane biyu, Anuhu da Iliya, waɗanda aka ɗauka daga ƙasa zuwa sama. Dukan su sun tafi gaba ɗaya. Abinda Iliya ya bari a baya ita ce alkyabba kaɗai, amma jikin sa ya tafi.

Kamar yadda na fahimci Littafi Mai Tsarki, wannan ma haka ya ke a gare mu. An ɗauke mu gaba ɗaya. Ba wai za a ɗauke mu ba; amma an riga an ɗauke mu gaba ɗaya— wato, ruhun mu, rai, da jiki. Ba mu cikin mulkin shaiɗan, ba mu kuma ƙarƙashin dokokin sa. Muna cikin mulkin Ɗan Allah kuma a ƙarƙashin dokokin Sa.