Salama da Sakankancewa

A cikin littafin Ishaya, mun karanta game da wani sakamakon adalci a rayuwar Krista:

“Aikin adalci kuma salama ne: abinda adalci kuma za ya jawo sai kwanciyar rai da sakankancewa har abada.” (Ishaya 32:17)

An ba da abubuwa uku na adalci a cikin wannan ayar: salama, kwanciyar rai, da sakankancewa. Dukan su sun kasance ne daga fahimtar cewa an mai da mu masu adalci da adalcin Yesu Kristi.

An bayyana wani sakamakon a cikin Romawa 14:17:

“Gama mulkin Allah ba ci da sha ba ne, amma adalci ne da salama da farinciki cikin Ruhu Mai Tsarki.”

Karatun jiya ya nuna mana cewa adalci na kawo ƙarfin zuciya; yau, mun ƙara da salama, kwanciyar rai, sakankancewa da kuma farin ciki. Duk waɗannan abubuwa ne na adalci. Idan ba mu sami adalcin Kristi ta wurin bangaskiya ba, to, za mu yi ta fama da kuma ƙoƙarin samun duk waɗannan halayen ba tare da mun cim ma su ba. Abin ban tausayi ne a ga Krista na ƙoƙarin zama masu farin ciki ko salama, ko ƙoƙarin samun kwanciyar hankali ko kuma sakankancewa. Wani ya gaya musu ya kamata su zama haka. Amma sanina ne cewa lokacin da suka sami tabbacin gafarar zunubi da adalci ta wurin bangaskiya, za su ga hakan kawai ya faru. Farin ciki zai cika ka ne kawai. Salama na zuwa ba tare da wani ƙoƙari ba. Za a sami sakankancewa. Karfin zuciya zai nuna kan shi. Tushen matsalar ita ce a sa mutane su gane cewa an mai da su adalai da adalcin Yesu Kristi.