Duwatsu Masu Sulɓi

Gaskiya ce cewa mutumin da ya tuba daga zunuban sa, ya kuma karɓi ceto a cikin Almasihu ba ya na nufin cewa an canza dukan halayen sa nan take ba. Tabbas, an fara samun wani muhimmin canji, amma yana iya ɗaukar shekaru masu yawa kafin wannan canjin ya bayyana a kowane sashi na halayen sa.

Lokacin da Dauda ya buƙaci duwatsu masu sulɓin da za su dace da majajjawar sa domin ya kashe Goliya, sai ya gangara zuwa cikin kwari — wuri na tawali’u. A can cikin kwarin ne ya sami irin duwatsun da yake buƙata. Me ya sa suka zama da sulɓi? Abubuwa biyu: na farko, ruwan da ke gudana a kansu; na biyu, ci gaba da gogayya da juna.

Wannan ne misalin yadda halin Krista yake samuwa. Da fari, akwai wankewa da ruwa ta wurin Kalma (dubi Afisawa 5:26). Na biyu, yayin da muke “gogayya” da juna a cikin dangantaka, a hankali halayen mu na gyaruwa har sai sun yi suɓul. Mu ne “duwatsu masu rai” da ke buƙatar a ci gaba da gyarawa (dubi 1 Bitrus 2:5).

Bari in ƙara da wani tsokaci cewa lokacin da Yesu yake buƙatar “duwatsu masu rai” domin majajjawar Sa, shi ma yana zuwa kwarin — wuri na tawali’u. A can, yana zaɓar duwatsu da aka gyara suka zama suɓul ta wurin Maganar Allah da kuma gogayyar zumunci na yau da kullum da sauran Masu Bi. Wannan ce alamar girma cikin ruhaniya wato, mu ƙaunaci ‘yan’uwa Masu Bi da gaske, ba kawai don yadda suke ba, amma domin matsayin su wurin Yesu, wanda ya zubar da jininsa mai tsarki domin kowannen su.