Jinin “Yana Magana”

Akwai wani ƙarin tanadi mai daraja da aka yi mana ta wurin jinin Yesu, wanda da yawa daga cikin Krista ba su sani ba. Ibraniyawa 12:22, 24 ta ce:

"Amma ku [duk Masu Bi na gaskiya] kun zo ga Dutsen Sihiyona... zuwa ga jinin yayyafawa kuma, wanda yake faɗin mafificin jawabi bisa ga na Habila."

A dutsen Sihiyona na sama, an yayyafa jinin Yesu a madadinmu a cikin Wuri Mafi Tsarki a gaban Allah. Almasihu ya shiga cikin wannan wuri a matsayin wanda ya riga mu, bayan ya karɓo fansarmu ta har abada ta wurin hadayarsa, ya kuma yayyafa shaidar wannan fansa a gaban Allah Uba Mai Iko Duka.

Ya kamata mu lura da bambanci mai muhimmanci a nan. A farkon tarihi, Kayinu, ɗan fari na Adamu da Hauwa'u, ya kashe ɗan'uwansa, Habila. Kayinu ya yi ƙoƙarin musun abin da ya yi, amma Ubangiji ya kalubalance shi ya ce, "Ba za ka iya ɓoye laifinka ba, domin jinin ɗan'uwanka da ka zubar a ƙasa yana kuka zuwa gare Ni don ramako." (dubi Farawa 4:1–15). A bambancin haka, jinin Yesu da aka yayyafa a sama ba ya kuka don ramako amma domin jinƙai ne. Jinin yana ci gaba da roƙo a gaban Allah domin jinƙansa.

Da zarar mun ba da shaida kan ikon jinin Yesu da kanmu, ba sai mun maimaita waɗannan kalmomi a kowane minti ba, domin jinin Yesu yana magana koyaushe a madadinmu a gaban Allah. Duk lokacin da muka shiga cikin wahala, jaraba, tsoro, ko damuwa, ya kamata mu tuna wa kan mu, Jinin Yesu yana magana a gaban Allah a madadina a wannan lokacin.