Cika Sharuɗɗan

Bari mu ƙara duba magana nan game da jinin da ke cikin

1 Yohanna 1:7:

“Amma idan muna tafiya cikin haske kamar yadda shi [Yesu] yake cikin haske, muna da zumunta da juna, kuma jinin Yesu Kristi Ɗansa yana tsarkake mu daga dukan zunubi.”

Mun riga mun ga yadda waɗannan abubuwa uku suke da alaƙa da juna cikin maganar Allah: tafiya cikin haske, zumunta da juna, da tsarkakewar jini. Yawancin mutane suna neman tsarkakewa da kariyar da ke cikin jinin amma ba su cika sharuɗɗan da za su ba su damar samun hakan ba. Tsarkakewa ta wurin jinin Yesu Kristi sakamako ne da ke biyo bayan wannan sharadi “idan” - wannan magana ce ta sharaɗi, wadda ta ke rataya a kan cikawar mu - idan muna tafiya cikin haske kamar yadda ya ke cikin haske. Daga nan, sakamako biyu za su biyo baya - ba ɗaya ba, amma biyu. Tsarkakewar Jini shine sakamako na biyu; sakamakon farko shi ne cewa muna zumunta da juna.

Ya zama kenan, idan ba ma zumunta da junanmu, wannan na nuna cewa ba cikin haske muke tafiya ba. Idan ba mu tafiya cikin haske, ya zama kenan ba za mu iya neman samun tsarkakewar jinin Yesu ba. Saboda haka, a ƙarshe dai za mu iya cewa: idan mun bar zumunta da juna, mun fita daga haske. Idan mun fita daga hasken, jinin ba ya tsarkake mu. Jinin Yesu yana tsarkakewa ne a cikin haske kaɗai. Wannan yana ɗaya daga cikin muhimman ƙa'idodin da za mu iya fahimta.