An Saya da Tamani

Kalmar nan ta fansa na nufin "a sake saya" Mu bayi ne a da, waɗanda aka sa a fili ana sayarwa a kasuwar bayi ta Shaiɗan. Manzo Bulus ya ce: “Ni mai halin mutuntaka ne, an sayar da ni a ƙarƙashin zunubi” (Romawa 7:14). A al’adun Romawa na zamaninsa, sayar da mutum a matsayin bawa shi ne a sayar da shi a ƙarƙashin Mashi. Zai tsaya a kan wani shinge da Mashi a miƙe bisa kansa. Da ka gan shi a tsaye haka, ka san cewa ana sayar da shi ne a matsayin bawa.

Bulus yana cewa a cikin wannan magana, “Zunubi na shine Mashin da yake bisa kaina, wanda ya sa aka sayar da ni bawa a kasuwar bayi.” Haka kuma a wurin mu ma muke —dukan mu, tare da Bulus a matsayin bayi saboda zunuban mu.

Amma wata rana, Yesu ya shiga kasuwar ya ce, “Zan saye su.” Menene farashin? Jinin Yesu. An sayo mu daga mulkin Shaiɗan aka kawo mu zuwa cikin mulkin Allah.

Bawa ba shi da wani zaɓi a kan irin aikin da zai yi wa ubangidan sa. Za a iya sa wani bawa ya zama mai dafa abinci, wata kuma ta zama karuwa— wannan shawarar mai bayin ne. Haka ne muka kasance. Wataƙila wasu bayi ne masu daraja, amma ba su fi waɗanda ba su da daraja da komi ba. Kada ku raina karuwai ko masu shaye-shaye, gama shawarar maigidan bayin ne. Shaiɗan ya yanke shawarar abin da za su kasance, amma jinin Yesu yana karya ikonsa kuma ya ‘yantar da su daga shirin Shaiɗan.